MLA Quota MLC Notification: నేడు ఎమ్మెల్యే కోటా ఎమ్మెల్సీ ఎన్నికలకు నోటిఫికేషన్
తెలంగాణలో ఎమ్మెల్యే కోటా కింద ఖాళీగా ఉన్న రెండు ఎమ్మెల్సీ ఉప ఎన్నికలకు గురువారం కేంద్ర ఎన్నికల సంఘం విడివిడిగా నోటిఫికేషన్ ఇవ్వనుంది. ఇటీవల జరిగిన అసెంబ్లీ ఎన్నికల్లో ఎమ్మెల్యేలుగా గెలిచిన పాడి కౌశిక్ రెడ్డి, కడియం శ్రీహరిలు డిసెంబర్ 9 వ తేదీన మండలి సభ్యత్వాలకు రాజీనామా చేశారు. దీంతో ఆ 2 స్థానాలు ఖాళీ అయ్యాయి. ఈ రెండు స్థానాల పదవీకాలం 2027 నవంబర్ 30వ తేదీ వరకు ఉంది. ఇప్పటికే ఈ రెండు స్థానాల భర్తీకి సెంట్రల్ ఎలక్షన్ కమిషన్ షెడ్యూల్ ప్రకటించింది. రెండింటికి వేర్వేరుగా ఉపఎన్నికలు నిర్వహించనున్నట్లు స్పష్టం చేసింది. దీంతో రాష్ట్రానికి చెందిన రెండు స్థానాలకు కూడా EC విడివిడిగా నోటిఫికేషన్ ఇవ్వనుంది.
ఉదయం 11 గంటలకు అసెంబ్లీ నోటీస్‌ బోర్డులో ఈ రెండు నోటిఫికేషన్లనూ అంటించనున్నారు. ఈ నెల 18 వరకూ నామినేషన్ల స్వీకరణ కార్యక్రమం ఉంటుంది. ఈ నెల 29న ఉపఎన్నికలకు పోలింగ్‌ జరగనుంది. అదే రోజున ఫలితాలు వెల్లడిస్తారు. పోటీ చేసే అభ్యర్థిని.. పది మంది ఎమ్మెల్యేలు ప్రతిపాదించాల్సి ఉండడంతో కాంగ్రెస్‌, BRS పార్టీలకే ఈ ఎన్నికల్లో పోటీ చేసే అవకాశం ఉంది. అయితే రెండు సీట్లకూ విడివిడిగా ఎన్నికలు జరుగుతున్న నేపథ్యంలో సభలో శాసనసభ్యుల సంఖ్యాబలం ఎక్కువగా ఉన్న అధికార కాంగ్రెస్‌కే రెండు ఎమ్మెల్సీ సీట్లూ దక్కనున్నాయి. ఈ నేపథ్యంలో బీఆర్‌ఎస్‌ పోటీకి దూరంగా ఉండే అవకాశం ఉందని చెబుతున్నారు.
