రేపట్నుంచి అల్పాహార పథకం.. మహేశ్వరంలో ప్రారంభించనున్న సీఎం
విద్యార్థుల సంక్షేమమే లక్ష్యంగా కేసీఆర్ సర్కారు మరో వినూత్న పథకానికి శ్రీకారం చుట్ట‌నుంది. విద్యావ్యవస్థను బలోపేతం చేసేలా ముఖ్యమంత్రి తీసుకున్న మరో చారిత్రక నిర్ణయం శుక్రవారం నుంచి అమల్లోకి రానుంది. దసరా కానుకగా అక్టోబర్ 6 నుంచి రాష్ట్రంలోని ప్రభుత్వ పాఠశాలల్లో ‘ముఖ్యమంత్రి అల్పాహార పథకం’ ప్రారంభం కానుంది. ఉన్న అన్ని తరగతుల విద్యార్థులకు ఇది అమలు చేయనున్నారు. శుక్రవారం ఉదయం 8.45గంటలకు సీఎం కేసీఆర్ మ‌హేశ్వ‌రం నియోజ‌క‌వ‌ర్గం రావిర్యాల జ‌డ్పీహెచ్ఎస్‌లో ఈ ప‌థ‌కాన్ని ప్రారంభించ‌నున్నారు. రాష్ట్రవ్యాప్తంగా 27,147 పాఠశాలల్లో 23 ల‌క్ష‌ల మంది విద్యార్థులు ఈ పథకం ద్వారా ప్ర‌యోజ‌నం పొంద‌నున్నారు. శుక్రవారం పథకం కానున్న నేపథ్యంలో విద్యాశాఖ బ్రేక్ ఫాస్ట్ మెనూ ఖ‌రారు చేసింది.
స్కూళ్లలో అందించే బ్రేక్ ఫాస్ట్ మెనూ
సోమ‌వారం – ఇడ్లీ సాంబార్ లేదా గోధుమ ర‌వ్వ ఉప్మా, చ‌ట్నీ
మంగ‌ళ‌వారం – పూరి, ఆలు కూర్మ లేదా ట‌మాటా బాత్, చ‌ట్నీ
బుధ‌వారం – ఉప్మా, సాంబార్ లేదా కిచిడి, చ‌ట్నీ
గురువారం – మిల్లెట్ ఇడ్లీ, సాంబార్ లేదా పొంగ‌ల్, సాంబార్
శుక్రవారం – ఉగ్గాని/ పోహా/మిల్లెట్ ఇడ్లీ, చ‌ట్నీ లేదా గోధుమ ర‌వ్వ కిచిడీ, చ‌ట్నీ
శ‌నివారం – పొంగ‌ల్, సాంబార్ లేదా వెజిట‌బుల్ పులావ్, రైతా/ఆలు కూర్మ
బ్రేక్ ఫాస్ట్ అందించే సమయం
ప్రైమరీ స్కూల్స్లో ఉదయం 8:45 గంట‌ల నుంచి అల్పాహారం అందించనున్నారు. హైద‌రాబాద్, సికింద్రాబాద్ ప‌రిధిలోని ప్రైమరీ స్కూల్స్లో ఉదయం 8 గంట‌ల నుంచి, అప్ప‌ర్ ప్రైమరీ, హై స్కూళ్లల్లో ఉదయం 8:45 గంట‌ల నుంచి బ్రేక్ ఫాస్ట్ అందించనున్నారు.
