త్వరలో ఏపీకి సీఎం రేవంత్ రెడ్డి..

తెలంగాణ సీఎం రేవంత్ రెడ్డి దూకుడు పెంచారు. వివిధ శాఖలపై వరుస సమీక్షలు నిర్వహిస్తున్నారు. అధికారంలోకి వచ్చిన రెండు రోజుల్లోనే ఆరు గ్యారెంటీల్లో రెండింటిని అమలు చేశారు. ఆరోగ్య శ్రీని 10 లక్షలకు పెంచడం, ఆర్టీసీ బస్సుల్లో మహిళలకు ఉచిత బస్సు ప్రయాణాన్ని అమలు చేశారు. అయితే త్వరలోనే రేవంత్ ఆంధ్రప్రదేశ్ వెళ్లనున్నారు. విజయవాడ కనక దుర్గమ్మను కుటుంబంతో సహా రేవంత్ దర్శించుకోనున్నారు. అయితే సీఎం ఏపీ పర్యటనకు సంబంధించిన తేదీ ఇంకా ఖరారు కాలేదు.

ఇక ఆదివారం రేవంత్ యశోద ఆస్పత్రిలో మాజీ సీఎం కేసీఆర్ను పరామార్శించారు. కేసీఆర్ ఆరోగ్య పరిస్థితిని మాజీ మంత్రి కేటీఆర్, హరీష్ రావులను అడిగి తెలుసుకున్నారు. ఇక ఇవాళ కాంగ్రెస్‌ సీనియర్‌ నేత, మాజీ మంత్రి కె.జానారెడ్డిని రేవంత్‌ మర్యాదపూర్వకంగా కలిశారు. దాదాపు గంటసేపు వీరిద్దరూ వివిధ అంశాలపై చర్చించారు. అనంతరం జానారెడ్డి మీడియాతో మాట్లాడుతూ నూతనంగా ఏర్పడిన ప్రభుత్వానికి అందరూ సహకరించాలని కోరారు. ఎన్నికల్లో కాంగ్రెస్‌ పార్టీ ఇచ్చిన హామీలను నెరవేర్చి, ప్రజాభిమానం సొంతం చేసుకోవాలని సీఎం రేవంత్‌రెడ్డికి సూచించారు.