తెలంగాణకు ఆరెంజ్ అలర్ట్..మూడు రోజులు వర్షాలు దంచుడే

తెలంగాణ రాష్ట్రాన్ని రానున్న మూడు రోజులు భారీ వర్షాలు ముంచెత్తనున్నాయి. నైరుతి రుతుపవనాల ప్రభావంతో రాష్ట్రంలోని పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరికలు జారీ చేసింది. గాలులు దిగువ స్థాయిలో పశ్చిమ దిశ నుంచి రాష్ట్రం మీదుగా వీస్తున్నాయని తెలిపింది. భారీ వర్ష సూచన ఉండటంతో వాతావరణ శాఖ రాష్ట్రానికి ఆరెంజ్ అలర్ట్‎ను జారీ చేశారు.

రానున్న 48 గంటలు రాష్ట్రంలోని 12 జిల్లాల్లో భారీ వర్షాలు పడే అవకాశం ఉందని వాతావరణ శాఖ తెలిపింది. భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, సంగారెడ్డి, మెదక్ జిల్లాలలో అక్కడక్కడ భారీ నుండి అతిభారీ వర్షాలు కురిసే ఛాన్స్ ఉండటంతో ప్రజలు అప్రమత్తంగా ఉండాలని సూచించింది.

ఆదిలాబాద్, కొమరం భీమ్ ఆసిఫాబాద్, మంచిర్యాల్, నిర్మల్, నిజామాబాద్, జగిత్యాల్, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, వరంగల్, హన్మకొండ, సిద్దిపేట, రంగారెడ్డి, నాగర్‌కర్నూల్ జిల్లాలకు ఆరెంజ్ అలర్ట్ ప్రకటించింది. ఇక జులై 7వ తారీఖున శుక్రవారం చాలాచోట్ల ఉరుములు, మెరుపులతో కూడిన భారీ వర్షాలు పడే అవకాశం ఉందని వాతావరణ శాఖ అధికారులు తెలిపారు.