హైదరాబాద్‌లో జరగాల్సిన ఇండియన్ రేసింగ్ లీగ్ రద్దు.. కారణమిదే
హైదరాబాద్ కార్ రేసింగ్ ప్రియులకు షాకింగ్ న్యూస్. హుస్సేన్ సాగర్ తీరాన, నెక్లెస్ రోడ్ వేదికగా ఈ నెలలో జరగాల్సిన ఎఫ్ ఫోర్ ఇండియన్ ఛాంపియన్ షిప్, ఇండియన్ రేసింగ్ లీగ్ ల నిర్వహణకు బ్రేక్ పడింది. తెలంగాణలో అసెంబ్లీ ఎన్నికల కోడ్ అమల్లోకి వచ్చిన నేపథ్యంలో హైదరాబాదులో జరగాల్సిన ఈ రెండు రేసింగ్ పోటీలు రద్దయ్యాయి. షెడ్యూ ల్‌ ప్రకారం ఈ నెల 4, 5 తేదీల్లో ఐఆర్‌ఎల్‌ ఫస్ట్ ఫేజ్ పోటీలు హైదరాబాద్ హుసేన్‌సాగర్‌ తీరప్రాంతంలో జరగాల్సి ఉంది. అయితే ప్రస్తుతం రాష్ట్రంలో ఎన్నికల కోడ్ దృష్ట్యా రేసింగ్ లీగ్‌కు పోలీస్‌ భద్రత ఏర్పాట్లలో ఇబ్బందులు తలెత్తే అవకాశం నెలకొంది. ఈ నేపథ్యంలో రేసింగ్ లీగ్‌ను హైదరాబాద్ నుంచి చెన్నైకి మారుస్తున్నట్లు నిర్వాహకులు మంగళవారం ఒక ప్రకటనలో పేర్కొన్నారు. అయితే ఇప్పటికే రేసింగ్ లీగ్ కోసం టిక్కెట్లు కొనుగోలు చేసిన అభిమానులకు త్వరలోనే డబ్బులు రీఫండ్‌ చేస్తామని వారు స్పష్టం చేశారు. ఈ మేరకు బుకింగ్ పార్టనర్ పేటీఎం ఇన్‌సైడర్ టిక్కెట్ హోల్డర్‌లకు దానికి సంబంధించిన ఇమెయిల్‌లను పంపుతుంది. వచ్చే నెల 10వ తేదీ వరకు నాలుగు అంచెల్లో ఫార్ములా-4 రేసింగ్ పోటీలు జరుగనున్నాయి.
