MLA Raja Singh : హుస్సేన్ సాగర్లోనే గణేశ్ నిమజ్జనం చేసి తీరుతాం : ఎమ్మెల్యే రాజాసింగ్
తెలంగాణ ప్రభుత్వంపై ఎమ్మెల్యే రాజా సింగ్ ఫైర్ అయ్యారు.( MLA Raja Singh On Ganesh Immersion ) గణేష్ నిమజ్జనంపై కోర్టులో ఎందుకు వాదించలేకపోతున్నారు అంటూ ఆయన మండిపడ్డారు. గత జీఓలను కోర్టుకు ప్రభుత్వం చూపించట్లేదని, ఎప్పటిలాగే నిమజ్జనం కొనసాగుతుందని అన్నారు. ఎవరైనా అడ్డొస్తే ప్రభుత్వమే అందుకు బాధ్యత వహించాలన్నారు. హుస్సేన్ సాగర్లో మురికినీరు కలవకుండా సర్కార్ చర్యలు తీసుకోవాలని రాజాసింగ్ తెలిపారు.
" హుస్సేన్ సాగర్లోనే యధావిధిగా గణేష్ నిమజ్జనం చేసి తీరుతాం. పోలీసులు అడ్డుకున్నా, ఏ సమస్య వచ్చినా ప్రభుత్వానిదే బాధ్యత. హైకోర్టులో ప్రభుత్వం తన వాదనలను సరిగా వినిపించలేకపోయింది. అందుకే కోర్టు నిమజ్జనాలకు వ్యతిరేకంగా తీర్పు ఇచ్చింది. గత 30 ఏళ్లుగా హుస్సేన్ సాగర్లోనే గణేశ్ నిమజ్జనాలు చేస్తున్నాం. ఇప్పుడు చేసి తీరుతాం. గణేష్ నిమజ్జనాలు చేస్తేనే హుస్సేన్ సాగర్ పొల్యూట్ అవుతోందా..? కెమికల్ ఫ్యాక్టరీలు, బస్తీల నుండి నాలాల ద్వారా కలుషిత నీరు హుస్సేన్ సాగర్లో చేరుతోంది. హుస్సేన్ సాగర్ని కొబ్బరి నీళ్లతో నింపుతానన్న కేసీఆర్ హామీ ఏమైంది? హిందువుల ఐక్యతని చూసి ఓర్వలేకనే గణేష్ నిమజ్జనాన్నిఅడ్డుకుంటున్నారు. కుల మతాలకు అతీతంగా గణేశ్ నిమజ్జనం జరుగుతుంది. దీనిని ఎవరూ ఆపలేరు"అని ఎమ్మెల్యే రాజాసింగ్ స్పష్టం చేశారు.
