కేసీఆర్ ఆహ్వానం.. నేడు సచివాలయానికి గవర్నర్ తమిళిసై

గవర్నర్‌ తమిళిసై సౌందర్‌రాజన్‌ శుక్రవారం సచివాలయానికి వెళ్లనున్నారు. సీఎం కేసీఆర్ ఆహ్వానం మేరకు ఆమె సెక్రటేరియెట్ ను సందర్శించనున్నారు. గురువారం రాజ్ భవన్ లో ఎమ్మెల్సీ పట్నం మహేందర్ రెడ్డి మంత్రిగా ప్రమాణస్వీకారం జరిగింది. ఈ సందర్భంగా సీఎం కేసీఆర్, గవర్నర్ మధ్య కొత్త సచివాలయం గురించి ప్రస్తావన వచ్చినట్లు సమాచారం.

కొత్త సచివాలయం అద్భుతంగా ఉందని గవర్నర్ చెప్పినట్లు తెలుస్తోంది. కొత్త సెక్రటేరియెట్ ముందు నుంచి వెళ్తున్నప్పుడు చూశానని బాగుందని గవర్నర్ కేసీఆర్తో చెప్పారు. హైదరాబాద్ గంగాజమునా తెహజీబ్ కు ప్రతీకగా సచివాలయ ఆవరణలో గుడి, మసీదు, చర్చి నిర్మించామని సీఎం అన్నారు. శుక్రవారం మధ్యాహ్నం 12 గంటలకు గుడిలో పూర్ణాహుతి ఉందని, ఆ కార్యక్రమానికి రావాల్సిందిగా ముఖ్యమంత్రి కేసీఆర్ గవర్నర్ తమిళిసైను ఆహ్వానించినట్లు సమాచారం. తప్పకుండా వస్తానని గవర్నర్‌ చెప్పినట్లు తెలుస్తోంది.