చికెన్ బొక్క ఇరగలేదని..బిర్యానీ సెంటర్పై కేసు
బిర్యానీ అంటే నచ్చని వారు ఎవరుంటారు చెప్పండి. ఆ పేరు వింటేనే అందరి నోరూరిపోతాయి. ఒక్కోప్రాంతంలో ఒక్కో రకం బిర్యానీకి క్రేజ్ ఉంటుంది. సమయం, సందర్భం అంటూ ఏమీ చూసుకోకుండా చాలా మంది వీలు చిక్కినప్పుడల్లా బిర్యానీని టేస్ట్ చేస్తుంటారు. అందుకే ప్రతి హోటల్లో రెస్టారెంట్లలో బిర్యానీ, మెనులో మొదటి ప్లేస్ లో ఉంటుంది. ఇదిలా ఉంటే బిర్యానీని టేస్ట్ చేద్దామనుకున్న ఓ యువకుడికి మాత్రం తాజాగా చేదు అనుభవం ఎదురైంది. ఎంత కొరికినా బిర్యానీలోని చికెన్ బొక్క ఇరగకపోవడంతో యువకుడికి ఇది చికెనేనా?అన్న అనుమానం వచ్చింది. దీంతో ఆ యువకుడు బిర్యానీ సెంటర్పై పోలీస్ స్టేషన్లో కేసు వేశాడు.
కరీంనగర్ జిల్లాలోని జమ్మికుంటలో ఈ ఘటన జరిగింది. ఓ యువకుడు బిర్యానీ టేస్ట్ చేయాలని స్థానికంగా ఉన్న రెడ్ బకెట్ ప్రాంచైజీ షాప్ కి వెళ్లాడు. ఓ బకెట్ బిర్యానీ ఆర్డర్ చేశాడు. ఆ బిర్యానీని ఇంటికి తీసుకెళ్లి మరీ తినడం మొదలుపెట్టాడు. బిర్యానీలో తన ఫేవరెట్ లెగ్ పీస్ తీసుకుని ఒక్క కొరుకు కొరికాడు...అయితే ఎంత కొరికినా బొక్క మాత్రం విరగలేదు. దీంతో ఇది అసలు చికెన్ బిర్యానీనేనా అన్న అనుమానం వచ్చింది ఆ యువకుడికి దీంతో వెంటనే బిర్యానీ కొనుగోలు చేసిన షాపుకు వెళ్లాడు. ఓనర్ను నిలదీశాడు. ఇది చికెన్ బిర్యానీనే కాదని వాగ్వాదానికి దిగాడు. ఇద్దరి మధ్య ఘర్షణ మొదలు కావడంతో పోలీసులు ఎంట్రీ ఇచ్చారు. పోలీసులకు యువకుడు అంతా చెప్పాడు. దీంతో పోలీసులు బిర్యానీతో పాటు బొక్కలను స్వాధీనం చేసుకున్నారు. షాపు ఓనర్తో పాటు యువకుడిని స్టేషన్‌కు తీసుకెళ్లారు.
ఈ పంచాయితీ లేలేలా లేదని పోలసులు వెంటనే ఫుడ్ ఇన్‌స్పెక్టర్‌కు సమాచారం అందించారు. ఫుడ్ ఇన్‌స్పెక్టర్ రెడ్ బకెట్ షాపును తనిఖీ చేశారు. బిర్యానీ, లెగ్‌పీస్ తో పాటు అందులో వాడుతున్న నూనె, ఇతర సామాన్ల సాంపిల్స్ను కలెక్ట్ చేశారు. వాటిని ల్యాబ్‌కు తరలించారు. ల్యాబ్ నుంచి వచ్చే రిపోర్టుల ఆధారంగా చర్యలు తీసుకుంటామని ఫుడ్ ఇన్‌స్పెక్టర్ తెలిపారు.
ఈ ల్యాబ్ టెస్ట్లో ఎలాంటి ఫలితం వస్తుందోనని అందరూ ఆసక్తితో ఎదురుచూస్తున్నారు.
