KTR; సిగ్గు లేకుండా మాట్లాడుతున్నారు.. మీరు చేసిందేంటో ముందు చెప్పండి

బీఆర్ఎస్ పార్టీ గతంలో కంటే ఇప్పుడు మరింత బలపడిందని ఐటీ శాఖ మంత్రి కేటీఆర్ అన్నారు. సోమవారం (ఆగస్టు 14) కామారెడ్డి జిల్లాలో పర్యటించిన ఆయన.. ఎల్లారెడ్డిలో ఏర్పాటు చేసిన బహిరంగ సభలో పాల్గొన్నారు. ఆ సభలో ప్రతిపక్షాలను ఉద్దేశించి మాట్లాడిన కేటీఆర్.. సీఎం కేసీఆర్ సంక్షేమ పథకాలు ప్రతీ ఇంటికి చేరుతున్నాయన్నారు. 2001 నుంచి ఇక్కడి ఎమ్మెల్యే సురేందర్ రెడ్డి కేసీఆర్ వెన్నంటే ఉంటూ.. చిత్తశుద్ధితో అభివృద్ధి పనులు చేస్తున్నారని అన్నారు. ప్రజల పక్షాణ నిలబడి, ప్రజల కోసం పనిచేసే ఏకైక పార్టీ బీఆర్ఎస్ అని కేటీఆర్ అన్నారు. ఆ క్రమంలో మాట్లాడుతూ ఆయన టీకాంగ్రెస్ నేతలపై మండిపడ్డారు. కాంగ్రెస్ నేతలెవరికీ సిగ్గులేదని అన్నారు.

రైతు రాజ్యం తేవాలని కేసీఆర్ అంటుంటే.. టీపీసీసీ చీఫ్ రేవంత్ రెడ్డి మాత్రం రైతులకు మూడు గంటలిస్తే చాలని చెప్తున్నారని తెలిపారు. రైతును రాజు చేసే బీఆర్ఎస్ కావాలా? మతం పేరుతో చిచ్చు పెట్టే బీజేపీ కావాలా? రాబంధులు కావాలా? రైతు బంధు కావాలా? తెలుసుకోవాలని ప్రజలనుద్దేశించి మాట్లాడారు. ఏం చేయాలో క్లారిటీ లేక.. గడప గడపకు కాంగ్రెస్ అంటూ టీకాంగ్రెస్ నేతలు తిరుగుతున్నారు. షబ్బీర్ అలీ మంత్రిగా ఉన్నప్పుడు కూడా కాంగ్రెస్ పార్టీ చేయని పనులు ఇప్పుడు బీఆర్ఎస్ పార్టీ చేస్తోందని చెప్పుకొచ్చారు. కాంగ్రెస్ పాలనలో కరెంట్ కోసం ఎంత ఇబ్బంద్ది పడ్డామో అందరికీ తెలుసు. 50 ఏళ్ల పాలనలో వాళ్లు చేసిందేం లేదని విమర్శించారు.