ఇసుక లారీ బీభత్సం..10 బైకులు ధ్వంసం.. ఒకరికి..

జయశంకర్ భూపాలపల్లి జిల్లాలో ఇసుక లారీ బీభత్సం సృష్టించింది. లారీ అదుపుతప్పి..పార్కింగ్ చేసిన వాహనాలపై దూసుకెళ్లింది. ఈ ప్రమాదంలో 10 బైకులు, రెండు కార్లు ధ్వంసం అయ్యాయి. ఈ క్రమంలో వాహనాన్ని పార్క్ చేస్తున్న రంజిత్ అనే వ్యక్తిపైకి లారీ దూసుకెళ్లింది. దీంతో వాహనాల మధ్య చిక్కుకుని అతడు నరకయాతన అనుభవిచాడు. పోలీసులు క్రేన్ సాయంతో అతడిని బయటకు తీసి ఆస్పత్రికి తరలించారు.

డ్రైవర్ మద్యంమత్తులో లారీని నడపడం వల్లే ఈప్రమాదం జరిగినట్లు తెలుస్తోంది. లారీ బీభత్సంతో స్థానికులు ఒక్కసారిగా ఉలిక్కిపడ్డారు. ప్రమాదం జరిగిన స్థలానికి పక్కనే విద్యుత్ ట్రాన్స్ ఫార్మర్ ఉండగా.. దానికి లారీ తగిలితే పెనుప్రమాదం సంభవించేది. దీంతో అంతా ఊపిరిపీల్చుకున్నారు. కాగా ఘటనపై పోలీసులు కేసు నమోదు చేసుకుని.. డ్రైవర్ను అదుపులోకి తీసుకుని విచారిస్తున్నారు.