హన్మకొండలో ఫాదర్ కొలంబో వైద్య కళాశాల ప్రారంభం
60 ఏళ్లలో 3 ప్రభుత్వ కాలేజీలు ఉంటే.. తెలంగాణ వచ్చిన తొమ్మిదేళ్లలో ఆ సంఖ్య 21కి చేరిందని మంత్రి హరీష్ రావు అన్నారు. హన్మకొండలో ఫాదర్ కొలంబో వైద్య కళాశాలను ఎర్రబెల్లి దయాకర్రావు, చీఫ్ విప్ వినయ్ భాస్కర్, ఎంపీ దయాకర్, మేయర్ సుధారాణితో కలిసి హరీష్ రావు ప్రారంభించారు. ఈ సందర్బంగా ఆయన మాట్లాడుతూ.."ఫాదర్ కొలంబో కల నేడు నెరవేరింది.ఈ ఆసుపత్రి ద్వారా పేదలకు ఉచిత వైద్య సేవలు అందించాలని కోరుతున్నాను. కొత్త మెడికల్ కాలేజీతో మూడు మెడికల్ కాలేజీలు ఉండే నగరంగా వరంగల్ పేరుగాంచింది. మెడికల్ కాలేజీ అంటే 500 పడకల ఆసుపత్రి వస్తుంది. ఇది ఇక్కడి ప్రజలకు ఎంతగానో ఉపయోగపడుతోంది. తెలంగాణ ప్రభుత్వం కుల, మతాల తేడా లేకుండా అందరికీ సమాన అవకాశాలు కల్పిస్తోంది. ఉత్తర తెలంగాణకు వైద్య సేవలు అందించేందుకు హెల్త్ సిటీ నిర్మాణం రూ.1100 కోట్లతో జరుగుతుంది. ప్రభుత్వం పూర్తి మద్దతు ఉంటుంది. నాడు ప్రభుత్వ , ప్రైవేటులో మొత్తం 20 మెడికల్ కాలేజీలు ఉంటే నేడు 55కు చేరాయి. ఎంబీబీఎస్ సీట్లు నాడు 2950 ఉండగా.. నేడు 8,340 సీట్లకు పెరిగాయి"అని హరీష్ రావు తెలిపారు.
