రండి బాబు రండి అగ్వ అగ్వ...సబ్‌స్టేషన్‌ అమ్ముతా.. కొంటారా ?
స్థానికంగా పవర్ సబ్‌స్టేషన్‌ నిర్మిణానికి స్థలం కావాలన్నారు. నేతలు, అధికారలు అందుకు బదులుగా ఉద్యోగం ఇస్తామన్నారు. నా భూమి ఇస్తే గ్రామానికి కరెంట్ వస్తుందని, తనకు ఉద్యోగం దొరుకుతుందని ఆ రైతు ఆశపడ్డాడు. అధికారులు కోరనినట్లుగానే భూమిని డొనేట్ చేశాడు. పవర్ సబ్ స్టేషన్ నిర్మాణం పూర్తైంది. అయితే ఈ సబ్‌స్టేషన్‌ నిర్మించి 9ఏళ్లు గడుస్తున్నా ఆ రైతుకు మాత్రం న్యాయం జరగలేదు. అధికారులు ఇచ్చిన హామీ నెరవేరలేదు. దీంతో కడుపురగిలిపోయిన ఆ అన్నదాత వినూత్న నిరసనకు దిగాడు. అది కాస్త సోషల్‌ మీడియాలో వైరల్‌గా మారింది. స్థానికంగా హాట్ టాపిక్గా మారింది.
ఖమ్మం జిల్లా నేలకొండపల్లి మండలం చెరువుమాదారం గ్రామానికి చెందిన రైతు ఆకుల నరసింహారావు 2014లో విద్యుత్‌ సబ్‌స్టేషన్‌ నిర్మాణానికి 12 గుంటల భూమిని ప్రభుత్వానికి దానంగా ఇచ్చాడు. రైతు భూమి ఇచ్చినందుకుగాను సబ్‌స్టేషన్‌లో ఆపరేటర్‌గా పని కల్పిస్తామని అధికారులు హామీ ఇచ్చారు. ఆ హామీ అధికారులు నెరవేర్చకున్నా తానే పైసా కూడా తీసుకోకుండా సబ్‌స్టేషన్‌లో ఉచితంగా పని చేస్తూ వచ్చాడు. తనకు ఉద్యోగం ఇవ్వాలంటే గతంలో ఆకుల నరసింహారావు పలుసార్లు నిరసన చేశారు. ఒకసారి సూసైడ్కి కూడా ప్రయత్నించారు అయినా ఆయన సమస్యకు పరిష్కారం లభించలేదు. దీంతో విసుగెత్తిన ఆకుల నరసింహారావు బుధవారం విద్యుత్‌ సబ్‌స్టేషన్‌ దగ్గరకు చేరుకుని అక్కడఓ ఫొటో దిగి సామాజిక మాధ్యమాల్లో షేర్ చేశాడు. ఈ సబ్‌స్టేషన్‌ అమ్ముతున్నా కావాలనుకున్నవారు నన్ను సంప్రదించండి అని కోరాడు. దీంతో ఈ న్యూస్ పెద్ద వైరల్ అయ్యింది. ఈ విషయం గురించి రైతును అడగ్గా.. అధికారులు ఇచ్చిన హామీ ప్రకారం తనకు ఉద్యోగమైనా ఇవ్వాలని, లేకపోతే ఎకరం భూమి అయినా ఇవ్వాలని డిమాండ్‌ చేశారు. మరి ఈ అంశంపై అధికారులు ఏవిధంగా స్పందిస్తారో వేచి చూడాల్సిందే.
