తెలంగాణకు అమిత్ షా.. పరేడ్ గ్రౌండ్లో పోస్టర్ల కలకలం..
కేంద్ర హోంమంత్రి అమిత్ షా ఇవాళ తెలంగాణకు వస్తున్నారు. ఆదివారం బీజేపీ తెలంగాణ ఆధ్వర్యంలో జరిగే విమోచన వేడుకల్లో ముఖ్య అతిథిగా పాల్గొంటారు. ఈ క్రమంలో పరేడ్ గ్రౌండ్లో షాకు వ్యతిరేకంగా పోస్టర్లు కన్పించడం కలకలం రేపుతున్నాయి. విమోచన సందర్భంగా తెలంగాణకు నిధులు ప్రకటిస్తారా అని పోస్టర్లలో ప్రశ్నించారు. గోవా లిబరేషన్ డే వేళ 300 కోట్లు ఇచ్చిన మోడీ ప్రభుత్వం.. తెలంగాణకూ నిధులు కేటాయిస్తారా అని నిలదీశారు. ప్రస్తుతం ఈ పోస్టర్లు చర్చనీయాంశంగా మారాయి.
అమిత్ షా ఇవాళ రాత్రి 7.55 గంటలకు ప్రత్యేక విమానంలో శంషాబాద్ ఎయిర్ పోర్టుకు చేరుకుంటారు. ముఖ్యనేతలతో సమావేశమై అసెంబ్లీ ఎన్నికలు, చేపట్టాల్సిన కార్యక్రమాలు, అభ్యర్థుల ఎంపికపై చర్చిస్తారు. అక్కడి నుంచి సీఆర్పీఎఫ్ సెక్టార్ ఆఫీసర్స్ మెస్కు వెళ్లి అక్కడే బస చేస్తారు. 17న ఉదయం 8.35గంటకు సికింద్రాబాద్ పరేడ్ గ్రౌండ్స్కు చేరుకుంటారు. 9 గంటల నుంచి 11 గంటల వరకు పరేడ్ గ్రౌండ్స్లో జరిగే తెలంగాణ విమోచన వేడుకల్లో పాల్గొంటారు. 11.15 గంటలకు పరేడ్ గ్రౌండ్స్ నుంచి శంషాబాద్ ఎయిర్ పోర్టుకు బయలుదేరి.. 11.50కి ఢిల్లీకి పయనమవుతారు.
