దొంగల దుశ్చర్య.. ట్రైన్ నుంచి కిందపడి టెక్కీ మృతి
ఏ క్షణంలో ఎవరి ప్రాణాలు ఎలా పోతాయనేది ఎవరూ ఊహించలేరు. పండుగ రోజని, సరదాగా కుటుంబ సభ్యులతో గడుపుదామని నగరం నుంచి సొంతూరికి బయల్దేరిన ఓ టెకీ అర్థాంతరంగా చనిపోయాడు. సెల్‌ఫోన్‌ను రక్షించుకోవాలనే తాపత్రయంతో రన్నింగ్‌ ట్రైన్ నుంచి పడి ప్రాణం కోల్పోయాడా యువకుడు. శాతావాహన్‌ ఎక్స్‌ప్రెస్‌లో బుధవారం బీబీనగర్(యాదాద్రి భువనగిరి) సమీపంలో ఈ విషాదం జరిగింది.
హన్మకొండ జిల్లా కమలాపూర్ మండలంలోని నేరెళ్లకు చెందిన ముప్పు రాములు, ధనమ్మ దంపతులకు ఇద్దరు అమ్మాయిలు, ఒక కొడుకు శ్రీకాంత్ ఉన్నారు. వ్యవసాయ కుటుంబం నుంచి వచ్చిన శ్రీకాంత్.. కష్టపడి ఉన్నత చదువులు పూర్తి చేసి హైదరాబాద్ ఇన్పోసిస్ లో సాఫ్ట్ వేర్ ఉద్యోగిగా జాబ్ సంపాదించాడు. నగరంలో స్నేహితులతో ఉంటూ జాబ్ చేస్తున్న అతడు.. తొలి ఏకాదశి పండుగ కోసం సికింద్రాబాద్ నుంచి శాతవాహన ఎక్స్ ప్రెస్ లో ఖాజీపేటకు బయలు దేరి వెళ్లాడు. ట్రైన్ లో రష్ ఎక్కువగా ఉండడంతో డోర్ దగ్గర మెట్లపై కూర్చొని ఫోన్ చూస్తున్నాడు. బీబీనగర్ రైల్వేస్టేషన్ దాటిన తర్వాత కింద ఉన్న కొందరు అతడి చేతిపై కర్రతో కొట్టి.. సెల్ ఫోన్ దొంగిలించేందుకు ప్రయత్నించారు. దీంతో కింద పడబోతున్న ఫోన్ ను పట్టుకోబోయిన శ్రీకాంత్ రైలులో నుంచి కిందకు జారీపడి తీవ్ర గాయాలతో చనిపోయాడు. దీంతో కమలాపూర్ మండలం నేరెళ్లలో విషాద ఛాయలు అలుముకున్నాయి. పండుగకు ఇంటికి కొడుకు వస్తాడని సంతోషంగా ఎదురు చూసిన ఆ తల్లిదండ్రులకు.. కొడుకు శవం ఎదురు రావడంతో కన్నీరు మున్నీరు అవుతున్నారు.
