ఢిల్లీ నుంచే తెలంగాణ పరిపాలన కేటీఆర్ కామెంట్స్
తెలంగాణ పరిపాలన ఢిల్లీ నుంచి జరుగుతోందని బీఆర్ఎస్ వర్కింగ్ ప్రెసిడెంట్ కేటీఆర్ విమర్శలు గుప్పించారు. సీఎం కొత్త క్యాంపు ఆఫీసు ఎందుకో ప్రజలకు సమాధానం చెప్పాలని కేటీఆర్ అన్నారు.రైతు భరోసాను ప్రారంభించామని సీఎం రేవంత్ రెడ్డి అన్నీ అబద్ధాలు చెబుతున్నారని రామారావు మండిపడ్డారు. అబద్ధాలు చెప్పిన సీఎం వెంటనే క్షమాపణలు చెప్పాలని డిమాండ్ చేశారు. దావోస్ వెళ్లి ప్రపంచ వేదికపై ముఖ్యమంత్రి పచ్చి అబద్ధాలు పలికారన్నారు. ఓ వైపు రైతుబంధు కూడా వేయకుండా మరోవైపు లేని రైతుభరోసాను ఉందని చెప్పడం విడ్డూరమన్నారు. రైతు భరోసా గురించి మాట్లాడటం ప్రజలను తప్పుదోవ పట్టించడమే అన్నారు. రేవంత్ రెడ్డి తన 45 రోజుల పాలనలో సాధించింది కేవలం ఢిల్లీ పర్యటనలు మాత్రమేనని ఎద్దేవా చేశారు.
ఇప్పటికే ముఖ్యమంత్రి కార్యాలయం ఉండగా. రేవంత్ రెడ్డికి కొత్త కార్యాలయం ఎందుకు? అని ప్రశ్నించారు. ప్రభుత్వాన్ని కాంగ్రెస్ నేతలు రాజకీయ పునరావాస కేంద్రంగా మార్చారని మండిపడ్డారు. అదానీ సంస్థలను ఓ వైపు తిడుతూనే మరోవైపు ఒప్పందాలు ఎలా చేసుకుంటున్నారో చెప్పాలన్నారు. కాంగ్రెస్ పార్టీ ఇచ్చిన 420 హామీలు అమలు చేసేలా వెంటాడుతామని హెచ్చరించారు. దుబాయ్ జైళ్లలో మగ్గుతున్న నలుగురు సిరిసిల్ల వాసులు త్వరలో విడుదలవుతున్నారని కేటీఆర్ చెప్పారు. 2009 నుంచి వారి విడుదల కోసం ప్రయత్నిస్తున్నట్లు తెలిపారు. పదిహేడేళ్ల తర్వాత ఈ నలుగురు రాష్ట్రానికి వస్తున్నట్లు తెలిపారు. వారు త్వరలో విడుదలవుతున్నారని తెలిపారు. ఎంపీ స్థానాల వారిగా నిర్వ‌హించిన స‌మావేశాలు విజ‌య‌వంతం అయ్యాయ‌ని కేటీఆర్ తెలిపారు. పార్ల‌మెంట్ నియోజ‌క‌వ‌ర్గాల స‌న్నాహ‌క స‌మావేశాల్లో కార్య‌క‌ర్త‌లు మంచి ఫీడ్ బ్యాక్ ఇచ్చారు. త్వరలో 30 వేల మంది సోష‌ల్ మీడియా కార్య‌క‌ర్త‌ల‌తో స‌మావేశాలు నిర్వ‌హిస్తామని ఆయన తెలిపారు.
