ముగిసిన స్కీనింగ్ కమిటీ భేటీ.. కాంగ్రెస్ ఫస్ట్ లిస్ట్ రెడీ..!
తెలంగాణ అసెంబ్లీ ఎన్నికల జాబితా ఎట్టకేలకూ సిద్ధమైనట్లు సమాచారం. రాష్ట్ర కాంగ్రెస్ స్క్రీనింగ్ కమిటీ దాదాపు 5 గంటల పాటు సమావేశమై ఈ మేరకు నిర్ణయం తీసుకున్నట్లు తెలుస్తోంది.
అభ్యర్థుల ఎంపికపై గురు, శుక్రవారాల్లో స్క్రీనింగ్ కమిటీ సుదీర్ఘంగా చర్చించింది. 60 శాతానికిపైగా అభ్యర్థుల విషయంలో ఏకాభిప్రాయం వచ్చినట్లు తెలుస్తోంది. మరో 40శాతం మంది అభ్యర్థుల లిస్టుపై మరోసారి భేటీయై చర్చించాలని నిర్ణయించినట్లు కాంగ్రెస్ వర్గాల్లో చర్చ నడుస్తోంది.
ఇదిలా ఉంటే టికెట్ కేటాయింపు అంశంపై కాంగ్రెస్ వార్ రూంలో టీపీసీసీ చీఫ్ రేవంత్ రెడ్డి, మాజీ పీసీసీ చీఫ్ ఉత్తమ్ కుమార్ రెడ్డి మధ్య వాడీవేడి వాదనలు జరిగినట్లు సమాచారం.సర్వేలు, సామాజిక, స్థానిక రాజకీయ స్థితిగతుల ఆధారంగా అభ్యర్థులను ఫైనల్ చేసినట్లు తెలుస్తోంది. స్క్రీనింగ్ కమిటీ సమావేశంలో ఛైర్మన్ మురళీధరన్, టీపీసీసీ చీఫ్ రేవంత్ రెడ్డి, ఎంపీలు కోమటిరెడ్డి వెంకటరెడ్డి, ఉత్తమ్ కుమార్ రెడ్డి, సీఎల్పీ నేత భట్టి విక్రమార్క సహా కీలక నేతలు పాల్గొన్నారు.
స్క్రీనింగ్ కమిటీ ఫైనల్ చేసిన దాదాపు 60 స్థానాల్లో పోటీచేసే అభ్యర్థుల ఎంపిక కోసం నేతలు తీవ్రంగా శ్రమించినట్లు తెలుస్తోంది. దాదాపు 30-35 స్థానాల్లో ఒకే అభ్యర్థి టికెట్ రేసులో ఉన్నారు. వీటిపై ఇప్పటికే క్లారిటీ రాగా దాదాపు 25-30 స్థానాల్లో ఇద్దరు చొప్పున బరిలో ఉండడంతో వాటిని కూడా ఈ సమావేశం కొలిక్కి తెచ్చారు. ఖరారైన 60 మంది అభ్యర్థుల పేర్లను స్క్రీనింగ్ కమిటీ పార్టీ కేంద్ర ఎన్నికల కమిటీకి పంపనుంది. కాంగ్రెస్ సీఈసీ గ్రీన్ సిగ్నల్ ఇచ్చిన వెంటనే సెప్టెంబర్ చివరి వారం లేదా అక్టోబర్ ప్రారంభంలో అభ్యర్థుల ఫస్ట్ లిస్ట్ రిలీజ్ చేయనున్నట్లు సమాచారం.
