ప్రభుత్వ నిర్ణయం.. రాష్ట్ర వ్యాప్తంగా పాఠశాలల పని వేళల్లో మార్పు

రాష్ట్ర వ్యాప్తంగా భారీ వర్షాలు కురుస్తున్న నేపథ్యంలో తెలంగాణ ప్రభుత్వం కీలక నిర్ణయం తీసుకుంది. ప్రభుత్వ పాఠశాలల వేళల్లో మార్పులు చేసింది. మంగళవారం (జులై 25) నుంచి పాఠశాలు నడిచే సమయాలు మారనున్నాయి. ఈ మేరకు ఉత్తర్వులు జారీ చేసిన ప్రభుత్వం.. ఉదయం 9:30 గంటలకు స్కూళ్లను ప్రారంభించాలని తెలిపింది. ప్రభుత్వం జారీ చేసిన ఉత్తర్వుల ప్రకారం.. ప్రైమరీ స్కూల్స్ ఉదయం 9:30 నుంచి సాయంత్రం 4:15 గంటల వరకు, సెకండరీ స్కూల్స్ ఉదయం 9:30 నుంచి సాయంత్రం 4:45 గంటల వరకు పనిచేస్తాయి. హైదరాబాద్- సికింద్రాబాద్ పరిధిలోని స్కూల్స్ మినహా రాష్ట్ర వ్యాప్తంగా స్కూళ్ల వేళల్లో మార్పు వర్తిస్తుందని ప్రభుత్వ ఉత్తర్వుల్లో తెలిపింది. దీనికి సంబంధించిన ఉత్తర్వులను రాష్ట్రంలోని అన్ని జిల్లాల డీఈవోలు, ఆర్జేజేడీఎస్ లకు పంపించింది.