తెలంగాణలో పెట్టుబడులకు ముందుకొచ్చిన మరో సంస్థ

తెలంగాణ రాష్ట్రంలో భారీ పెట్టబడులను పెట్టడానికి అంతర్జాతీయ స్థాయి సంస్ధ రెన్యూ సిస్ ఇండియా ప్రైవేట్ లిమిటెడ్ ముందుకొచ్చింది. రూ.6 వేల కోట్ల వ్యయంతో రాష్ట్రంలో సోలార్ పీవీ మాడ్యూల్, పీవీ సెల్స్ తయారీ యూనిట్లను నెలకొల్పడానికి ఈ దిగ్గజ సంస్ధ రాష్ట సర్కారుతో నేడు ఒప్పందం కుదుర్చకుంది. మంత్రి దుద్దళ్ల శ్రీధర్ బాబు సమక్షంలో ఐటీ శాఖ కార్యదర్మి జయేశ్ రంజన్ ఒప్పందం పై సంతకాలు చేశారు. ఈ ఇండస్ట్రీ ఏర్పాటుతో హైదరాబాద్ సోలార్ పరికరాల తయారీకి హబ్‌గా మారుతుందని తెలిపారు.

కర్నాటక, మహారాష్ట్రలో ఆ సంస్థకు తయారీ యూనిట్లు ఉన్నప్పటికీ అతిపెద్ద తయారీ యూనిట్‌ను హైదరాబాద్‌లో నెలకొల్పాలని ఆ సంస్థ నిర్ణయం సంతోషంగా ఉందన్నారు. ముఖ్యమంత్రి రేవంత్ రెడ్డి సారథ్యంలో రాష్ట్ర ప్రభుత్వం ఎలక్ట్రానిక్స్ పరికరాల తయారీని ప్రోత్సహిస్తుందని, ఈ రంగంలో మరిన్ని పెట్టుబడులను ఆకర్శించనున్నట్లు తెలిపారు. ఇందుకోసం సమగ్ర ఇంధన పాలసీని రూపొందిస్తున్నామని ప్రకటించారు. ఈ పరిశ్రమ వల్ల రానున్న మూడేళ్లలో దాదాపు 400 మందికి ఉపాధి లభిస్తుందని శ్రీధర్ బాబు తెలిపారు. తెలంగాణలో ఏరోస్పేస్, డిఫెన్స్ రంగాలు కోర్ రంగాలుగా ఉన్నాయని, ఈ రంగాల్లో అనేక ఎంఎస్ఎంఈ పరిశ్రమలు ఉన్నాయని ఆయనపేర్కొన్నారు.