నేటి నుంచి ప్రతి మండలంలో 'సీఎం బ్రేక్ ఫాస్ట్'

రాష్ట్ర ప్రభుత్వం ఇటీవల ప్రారంభించిన 'సీఎం బ్రేక్ ఫాస్ట్' పథకాన్ని నేటినుంచి ప్రతి మండలంలోని ఒక ప్రభుత్వ పాఠశాలలో అమలు చేయనున్నారు. వచ్చే సోమవారం నుంచి మరికొన్ని స్కూళ్లకు విస్తరించనున్నారు. ఆపై వచ్చే 3 సోమవారాలు పూర్తయ్యేనాటికి రాష్ట్రంలోని అన్ని పాఠశాలల్లో ఈ పథకాన్ని అమలు చేయనున్నారు. ఇటీవల పైలట్ ప్రాజెక్టుగా మంత్రులు రాష్ట్రంలో కొన్ని పాఠశాలల్లో 'సీఎం బ్రేక్ ఫాస్ట్' పథకాన్ని ప్రారంభించిన విషయం తెలిసిందే. దసరా తరువాత అన్ని పాఠశాల్లో విద్యార్థులకు అల్పాహారాన్ని అందిస్తామని ప్రకటించారు. అయితే అంచెలంచెలుగా ఈ పథకాన్ని అన్ని పాఠశాలలకు విస్తరించనున్నారు.

నియోజకవర్గానికి ఒకటి చొప్పున ఈ పథకాన్ని ప్రారంభించిన బడుల్లో విద్యార్థుల హాజరుశాతం పెరిగింది. డుమ్మాలు, డ్రాపౌట్లు గణనీయంగా తగ్గాయి. స్కీం అమలైన గత 20 రోజుల వ్యవధిలోనే బడులకు విద్యార్థుల హాజరు భారీగా పెరగడం విశేషం. గురువారం నుంచి మండలానికొక బడి చొప్పున ఈ పథకాన్ని విస్తరించనున్నారు. వచ్చే సోమవారం నుంచి స్కూళ్ల సంఖ్యను పెంచుతూ.. మరో మూడు వారాల్లో రాష్ట్రంలోని అన్ని ప్రభుత్వ పాఠశాలల్లో సీఎం బ్రేక్‌ఫాస్ట్‌ను అందించనున్నారు.

ఈ పథకాన్ని అక్టోబర్ 6 న వెస్ట్‌ మారేడుపల్లిలోని ప్రభుత్వ పాఠశాలలో మంత్రి కేటీఆర్‌ ప్రారంభించారు. మ‌ధ్యాహ్నం భోజ‌నంలో భాగంగా ప్ర‌తి విద్యార్థికి సన్న‌బియ్యంతో కూడిన భోజ‌నంతో పాటు ఉద‌యం పూట కూడా నాణ్య‌మైన బ్రేక్ ఫాస్ట్ పెడితే బాగుంటుంద‌ని ఈ పథకాన్ని ప్రారంభిమన్నారు కేటీఆర్. ఈ పథకం విద్యా వ్యవస్థలో సమూల మార్పులు తీసుకు రానున్నదని, స్కూల్‌ డ్రాపౌట్స్‌ తగ్గుతాయని చెప్పారు. ప‌నుల‌కు వెళ్లే త‌ల్లిదండ్రుల పిల్ల‌లకు ఈ ప‌థ‌కం ఎంతో ఉప‌యోగ‌ప‌డుతుందని.. పోష‌కాల‌తో కూడి అల్పాహారం విద్యార్థుల‌కు అందుతుందని ఆనాడు కేటీఆర్ అన్నారు.