ఎన్నికల వేళ.. కొత్త వైన్ షాప్లకు ఫుల్ డిమాండ్

తెలంగాణలో మద్యం దుకాణాల లైసెన్స్ల జారీకి ప్రభుత్వం ఇటీవల నోటిఫికేషన్ ప్రకటించిన విషయం తెలిసిందే. ఇప్పుడున్న 2,620 మద్యం దుకాణాల లైసెన్స్ గడువు నవంబర్ 30తో ముగుస్తుండటంతో.. కొత్త లైసెన్సుదారుల ఎంపికకు సంబంధించి ఎక్సైజ్ శాఖ ఈ నోటిఫికేషన్ విడుదల చేసింది. డిసెంబర్ నుంచి మద్యం షాపుల ఏర్పాటుకు కొత్త లైసెన్స్లను లాటరీ ద్వారా మంజూరు చేస్తారు. ఈ నెల 3న జిల్లాల వారీగా ఎక్సైజ్ శాఖ నోటిఫికేషన్ విడుదల చేశారు. ఈ నెల 4 నుంచి 18వ తేదీ వరకు అప్లికేషన్స్ పెట్టుకోవచ్చు. ఆగస్ట్ 21న డ్రా ద్వారా మద్యం షాపుల లైసెన్సులు జారీ చేస్తారు.

కాగా, మద్యం షాపుల టెండర్ అప్లికేషన్ కు విపరీతమైన స్పందన వస్తోంది. కేవలం 3 రోజుల్లో 2620 వైన్ షాపులకు ఏకంగా 2000కు పైగా అప్లికేషన్లు వచ్చినట్లు ఎక్సైజ్ శాఖ అధికారులు తెలిపారు. ఎన్నికల ఏడాది కావడంతో వైన్ షాప్ లైసెన్స్ లకు భారీ స్పందన వస్తోందని అధికారులు చెప్తున్నారు. రాష్ట్రంలో ముఖ్యంగా రంగారెడ్డి, ఖమ్మం, వరంగల్ , కరీంనగర్, నిజామాబాద్ జిల్లాల నుంచి ఎక్కువగా అప్లికేషన్లు వచ్చాయి. ఈ నెల 18తో అప్లికేషన్ గడువు ముగుస్తుండటంతో దరఖాస్తుల సంఖ్య ఇంకా పెరిగే అవకాశం ఉంది. కాగా, ఈసారి అప్లికేషన్ ఫీజును రూ. 2లక్షలు చేశారు.