పల్లెవెలుగు టౌన్ బస్‌పాస్‌’..రేపటి నుంచే అందుబాటులోకి
ప్రయాణికుల ఆర్ధిక భారం తగ్గించేందుకు టీఎస్ఆర్టీసీ కీలక నిర్ణయం తీసుకుంది. కొత్త బస్ పాస్ విధానాన్ని అమల్లోకి తీసుకొచ్చింది. ‘పల్లెవెలుగు టౌన్ బస్‌పాస్‌’ను టీఎస్ఆర్టీసీ ప్రవేశపెట్టింది. దీనికి సంబంధించిన పోస్టర్‌ను ఆర్టీసీ ఎండీ సజ్జనార్ ఆవిష్కరించారు. జూలై 18 నుంచి ఈ బస్ పాస్ అందుబాటులోకి రానుంది.
ముందుగా కరీంనగర్‌, మహబూబ్‌నగర్‌, నిజామాబాద్, నల్గొండ జిల్లా కేంద్రాల్లో దీన్ని అందుబాటులోకి తీసుకురానున్నారు. 10 కి.మీ. పరిధిలో నెలకు రూ.800, 5 కి.మీ పరిధిలో నెలకు రూ.500తో ఈ పాస్ ధర ఉండనుంది. ఇంతకుముందు 10 కిలోమీటర్ల పరిధికి రూ.1200, 5 కిలోమీటర్ల పరిధికి రూ.800 ధర ఉండగా..ఇప్పుడు టీఆఎస్ఆర్టీసీ రాయితీ కల్పించింది. కొత్తగా తీసుకువచ్చిన ఈ పాస్‌ను హైదరాబాద్, వరంగల్‌లో మాదిరిగానే ప్రయాణికులు ఆదరించి.. సంస్థను ప్రోత్సహించాలి అని ఎండీ వీసీ సజ్జ‌న‌ర్ కోరారు.ఈ బస్ పాస్‌కు సంబంధించిన పూర్తి వివరాలకు టీఎస్ఆర్టీసీ కాల్‌ సెంటర్‌ నంబర్లు 040-69440000, 040-23450033ను సంప్రదించాలని ఆయన సూచించారు.
