TS Assembly Elections 2023 : కొత్త ప్రభాకర్ రెడ్డిపై కాదు.. నాపై దాడి జరిగినట్లే..- సీఎం కేసీఆర్

మెదక్ ఎంపీ కొత్త ప్రభాకర్ రెడ్డిపై దాడి ఘటనపై సీఎం కేసీఆర్ స్పందించారు. బాన్సువాడలో నిర్వహించిన ప్రజా ఆశీర్వాద సభలో పాల్గొన్న ఆయన ఈ దాడిని తీవ్రంగా ఖండించారు. ప్రభాకర్ రెడ్డిపై దాడి తనపై దాడేనని అన్నారు. పిరికిపందలే ఇలాంటి పనులకు పాల్పడుతున్నారని చెప్పారు. దాడులకు పాల్పడేవారు తస్మాత్ జాగ్రత్త అని హెచ్చరించారు.

సహానాన్ని పరీక్షిస్తే ఉపేక్షించే ప్రసక్తేలేదని కేసీఆర్ హెచ్చరించారు. ఎన్నికల్లో తలపడలేని చేతగాని దద్దమ్మలే కత్తులతో దాడులకు పాల్పడుతున్నారని మండిపడ్డారు. ప్రజాసేవ చేస్తే దాడులు చేస్తారా అని ప్రశ్నించిన కేసీఆర్.. దుర్మార్గాన్ని, హింసా రాజకీయాల్ని ఖండించాలని అన్నారు. పనిచేసే చేతగాక హింసకు దాడులకు పాల్పడే వారికి తెలంగాణ సమాజమే బుద్ధి చెప్పాలని పిలుపునిచ్చారు. సహనాన్ని పరీక్షిస్తే తమ దమ్మేందో చూపిస్తామని కేసీఆర్ వార్నింగ్ ఇచ్చారు.

ప్రభాకర్ రెడ్డిపై దాడిని అడ్డుకునే ప్రయత్నం చేసిన గన్ మెన్ కు సైతం గాయాలు అయ్యాయని కేసీఆర్ అన్నారు. భగవంతుని దయవల్ల ప్రాణాపాయం తప్పిందని చెప్పారు. దాడి గురించి తెలిసి తన మనసు బాగోలేదని కేసీఆర్ ఆవేదన వ్యక్తం చేశారు.