టమాటాలు లేకపోతే ఏం...ఇవి ఉన్నాయిగా

ఎర్రగా...అన్ని వంటకాల్లో ఇమిడిపోయే టమటా అంటే అందరికీ ఎంతో ఇష్టం. చాలా ఇళ్ళల్లో టమాటా లేకుండా వంటే ఉండదు. కానీ ఈమధ్య కాలంలో వాటిని వాడాలంటే భయపడుతున్నారు. ఒకప్పుడు మురిపించిన ఆ ఎరుపై ఇప్పుడు జడిపిస్తోంది. కొండెక్కి కూర్చున్న టమాటల దగ్గరకు చేరుకోలేక జనాలు అవస్థలు పడుతున్నారు. టమాటా లేకుండా వంట ఎలా చేయాలా అని తలలు పట్టుకుంటున్నారు. అయితే చాలా మందికి తెలియని విషయం ఏంటంటే అస్సలు టమాటాల్లేకుండా కూడా రుచికరమైన వంటలు చేసుకోవచ్చు. అదే టేస్ట్ వచ్చేలా వేరే పదార్ధాలు ఎంచక్కా వాడుకోవచ్చు. అవేమిటో మీరూ తెలుసుకోవాలనుకుంటున్నారా...అయితే దీన్ని మీరు చదవాల్సిందే.

సాధారణంగా మన వంటల్లో టమాటాలు పులుపు కోసం వాడుతుంటాం. వంటలకు ఆ పులుపు ఇచ్చే రుచి కోసం పాకులాడుతుంటాం. అదే రుచిని వేరే పదార్ధాలు కూడా ఇస్తాయి. వాటిల్లో మొదటిది చింతపండు. టమాటాకు ప్రత్యామ్నాయంగా 100 పర్శంట్ దీన్ని వాడుకోవచ్చును. టేస్ట్ కూడా చాలా బావుంటుంది. రసం, సాంబార్ లాంటి వాటిల్లో టమాటా కంటే చింతపండు వేసుకుంటే రుచి ఎక్కువ బావుంటుంది.

ఉసిరి: ఉసిరిలో సహజ పులుపు ఉంటుంది. ఇందులో విటమిన్ సి కూడా పుష్కలంగా ఉంటుంది. టొమాటో గుజ్జులా ఉంటుంది. అందువల్ల తక్కువ టమోటాలలో మంచి ప్యూరీ తయారవుతుంది. ఉసిరికాయతో అలాంటి గుజ్జు కావాలంటే వాటిని ఉడకబెట్టి, అందులో బెల్లం కలపాలి. అంతే పుల్లగా, తియ్యగా ఉండే ప్యూరీ రెడీ.

పెరుగు: టమాటాకు బదులు పుల్లనిపెరుగు ఎంచక్కా వాడుకోవచ్చును. దీనివల్ల రుచే కాదు కూర క్వాంటిటీ కూడా పెరుగుతుంది. చిక్కదనాన్ని కలిగిస్తుంది. వెజం, నాన్ వెజ్ అన్నింటిలోనూ పెరుగును వాడుకోవచ్చును.

మామిడి, ఆమ్ చూర్: కూరల్లో పులుపు కోసం ఆమ్ చూర్ పొడి, వంగమామిడి ముక్కలు, పచ్చి మామిడి వరుగు లాంటి వాటిని చేర్చుకోవచ్చు.ఇవన్నీ పులుపుతో పాటూ కూర రుచిని కూడా పెంచుతాయి. అలాగే పుల్లగా ఉండే ఆకుకూరలు అంటే చుక్కకూర, గోంగూరలాంటివి కూడా జతచేసుకోవచ్చును. దీనివల్ల ఆరోగ్యం కూడా మెరుగుపడుతుంది.

రెడ్ క్యాప్సికమ్: రెడ్ క్యాప్సికమ్‌ లో విటమిన్ సి పుష్కలంగా ఉంటుంది.టొమాటోల్లో లైకోపీన్ అనే యాంటీఆక్సిడెంట్ ఉంటుంది. ఇది క్యాప్సికమ్‌లో కూడా ఉంటుంది. ఆసక్తికరమైన విషయమేమిటంటే టమాటాలో కంటే రెడ్ క్యాప్సికమ్‌లో విటమిన్ సి ఎక్కువగా ఉంటుంది. కారంగా, పుల్లగా ఉండే రెడ్ క్యాప్సికమ్ మన కూరలకు టమాటా ఇచ్చే రుచి కంటే ఎక్కువ రుచినే ఇస్తుంది.

వెనిగర్: చైనీస్ వంటల్లో ఎక్కువగా వాడే వెనిగర్ పుల్లగా ఉంటుంది. ఇది కూడా ఫుడ్ కు మంచి టేస్ట్ ని ఇస్తుంది.

ఉల్లిపాయలు: టేస్ట్ కోసమే కాకుండా గ్రేవీ కోసం కూడా టమాటాలను వాడుతూ ఉంటారు. టమాటాలు ఇచ్చే చిక్కదనం, గ్రేవీని ఉల్లిపాయలు కూడా ఇస్తాయి. వీటిని వేయించి, పేస్ట్ చేసుకుని వాడితే గ్రేవీ వస్తుంది. రుచి కూడా అదిరిపోతుంది.చూశారుగా టమాటా ధరలు కొండెక్కితే మనకేం, ఆకాశాన్నంటితే మనకేం....దాని గురించి బాధపడకుండా, వంట ఎలా చేయాలా అని టెన్షన్ పడకుండా హాయిగా మన వంటలు మనం ఎప్పటిలానే చేసుకోవచ్చును. మరింకెందుకు ఆలస్యం మీరు పాటించేయండి ఈ చిట్కాలు....మంచి ఫుడ్ ని ఎంజాయ్ చేయండి.