కూతురికి అంత్యక్రియలు నిర్వహించిన తండ్రి..అంతలోనే ఆమె నుండి వీడియో కాల్...

బీహార్‎లో ఓ వింతైన సంఘటన జరిగింది. తన కూతురికి బరువెక్కిన హృదయంతో అంత్యక్రియలు నిర్వహించిన ఓ తండ్రికి ఇంటికి రాగానే అనుకోని షాక్ ఎదురయ్యింది. చనిపోయింది అని అనుకున్నకూతురు కాస్త వీడియో కాల్ చేయడంతో ఒక్కసారిగా ఆశ్చర్యపోయాడు. ‘నాన్నా నేను బతికే ఉన్నాను, క్షేమంగా ఉన్నాను’ అని తన క్షేమ సమాచారం చెప్పడంతో వీడియో కాల్‌లో కూతురి ముఖం చూసి ఆ తండ్రి కళ్లలో ఆనందం ఉప్పొంగింది. ఈ విచిత్రమైన సంఘటన పూర్నియా జిల్లాలోని అక్బర్‌పూర్ పోలీస్ స్టేషన్ పరిధిలో జరిగింది. స్థానికంగా ఉంటున్న అనూషా కుమారి అనే యువతి గత నెల రోజులుగా కనిపించకుండా పోయింది. దీంతో కూతురు కనిపించడం లేదంటూ యువతి పేరెంట్స్ పోలీస్ స్టేషన్‎లో కంప్లైంట్ఇచ్చారు. యువతి కుటుంబ సభ్యులు అనేక చోట్ల అన్వేషించారు. కానీ ఆమె ఆచూకీ లభించలేదు.

ఈ క్రమంలో తాజాగా పూర్ణియాలోని ఓ కాలువలో ఓ యువతి డెడ్ బాడీని పోలీసులు గుర్తించారు. ఆ మృతదేహానికి అనూష మిస్ అయిన సమయంలో వేసుకున్న బట్టలులాగే పోలి ఉన్న బట్టలు ఉన్నాయి. అయితే ముఖం మాత్రం నుజ్జునుజ్జయింది. దీంతో పోలీసులు ఇచ్చిన సమాచారం మేరకు కాలువలో లభించిన డెడ్ బాడీ అనూషదని ఆమె తల్లిదండ్రులు అంగీకరించి ఆ డెడ్ బాడీకీ అంత్యక్రియలు నిర్వహించారు. తప్పిపోయిన అనూష చనిపోయిందన్న వార్త సోషల్ మీడియాలో వైరల్ అయ్యింది. ఈ వార్త కాస్త అనూష వరకు చేరుకుంది. ఆందోళన చెందిన అనూష వెంటనే తన తండ్రికి వీడియో కాల్ చేసింది. దీంతో ఒక్కసారిగా అనూష కుటుంబసభ్యులు ఆనందంలో మునిగిపోయారు.

తండ్రికి ఫోన్ చేసిన అనూష నాన్నా నేను బతికే ఉన్నాను అని చెప్పడంతో ఆయన కళ్లలో ఆనందం వెల్లివిరిసింది. నువ్వెక్కడ ఉన్నావు..ఏం చేస్తున్నావు అని తండ్రి ప్రశ్నించగా.. ప్రేమించిన యువకుడి పెళ్లి చేసుకుని అత్తగారింట్లో సంతోషంగా ఉంటున్నట్లుగా యువతి చెప్పింది. దీంతో అనూష తల్లిదండ్రులు పోలీసులకు సమాచారం ఇచ్చారు.

అయితే, అనూష డెడ్ బాడీ అనుకుని అంత్యక్రియలు చేసింది ఎవరికి అన్నది ఇప్పుడు హాట్ టాపిక్‎గా మారింది. విషయం తెలుసుకున్న పోలీసులు దర్యాప్తును ముమ్మరం చేశారు. విచారణలో షాకింగ్ విషయం బయటపడింది. ఓ పరువు హత్య కేసు వెలుగులోకి వచ్చింది. కూతురి ప్రేమను అంగీకరించని పేరెంట్స్ ఆమెను హత్య చేసి కాల్వలో పడేసిన సంఘటన స్థానికంగా సంచలనంగా మారింది. ప్రస్తుతం ఆ యువతి తల్లిదండ్రులు అజ్ఞాతంలోకి వెళ్లినట్లు సమాచారం.