ఎంఫిల్ డిగ్రీపై యూజీసీ కీలక ప్రకటన

ఎంఫిల్ డిగ్రీకి గుర్తింపు లేదని, ఎవరూ కూడా ఆ కోర్సులో చేరవద్దని యూనివర్సిటీ గ్రాంట్స్ కమిషన్ (UGC) విద్యార్థులను హెచ్చరించింది. ఈ మేరకు యూజీసీ కార్యదర్శి మనీశ్ జోషి ఓ ప్రకటన విడుదల చేశారు. ఎంఫిల్ లో చేరాలంటూ కొన్ని విద్యాసంస్థలు నోటిఫికేషన్లు జారీ చేశాయని, అయితే ఎంఫిల్ డిగ్రీకి యూజీసీ గుర్తింపు లేదని పేర్కొన్నారు. ఈ నేపథ్యంలో 2023-24 విద్యా సంవత్సరానికి సంబంధించి ఎంఫిల్ అడ్మిషన్ల ప్రక్రియను వెంటనే నిలిపివేయాలని యూనివర్సిటీలకు ఆయన ఆదేశాలు జారీ చేశారు. దేశంలో ఎంఫిల్ డిగ్రీని నిలిపివేస్తూ యూజీసీ గతంలోనే నిర్ణయం తీసుకుందని తెలిపారు. ఈ ప్రోగ్రామ్ ను ఉన్నత విద్యాసంస్థలు అందించరాదంటూ యూజీసీ నిబంధనలు-2022 రెగ్యులేషన్ నంబర్ 14 స్పష్టంగా చెబుతోందని తెలిపారు. ఈ క్రమంలోనే విద్యార్థులెవరూ ఎంఫిల్ కోర్సులో జాయిన్ కావొద్దని ఆయన సూచించారు.