బీఆర్ఎస్కు షాక్.. కాంగ్రెస్లో చేరిన బీఆర్ఎస్ కౌన్సిలర్లు

హుజురాబాద్ నియోజకవర్గంలో బీఆర్ఎస్ కు బిగ్ షాక్ తగిలింది. హుజురాబాద్ నియోజకవర్గంలోని జమ్మికుంట మున్సిపాలిటీకి చెందిన 13 మంది బీఆర్ఎస్ కౌన్సిలర్లు మంత్రి పొన్నం ప్రభాకర్ సమక్షంలో కాంగ్రెస్ లో చేరారు. హుజురాబాద్ కాంగ్రెస్ ఇంచార్జ్ ప్రణవ్ ఆధ్వర్యంలొ వారంతా కాంగ్రెస్ తీర్థం పుచ్చుకున్నారు. అంతకు ముందు వారంతా బీఆర్ఎస్ కు రాజీనామా చేస్తున్నట్లు ప్రకటించారు. కాంగ్రెస్ లో చేరినవారిలో బొంగోని వీరన్న, మారపల్లి భిక్షపతి, మేడిపల్లి రవీందర్, ఎలగందుల స్వరూప-శ్రీహరి, పిట్టల శ్వేత-రమేశ్, పొనగంటి సారంగం, పొనగంటి రాము, బిట్ల కళావతి-మోహన్, కుతాడి రాజయ్య, దేశిని రాధ-సదానందం, గుల్లి పుల్లమ్మ-మొగిలి, దిడ్డి రామ్మోహన్, రావికంటి రాజకుమార్ లు ఉన్నారు. మున్సిపల్ చైర్మన్ తక్కళ్లపల్లి రాజేశ్వరరావు అవినీతి పాలన, నిధుల దుర్వినియోగం, ఒంటెద్దు పోకడలకు విసుగు చెందే తాము కాంగ్రెస్ లో చేరినట్లు వారు ప్రకటించారు. అలాగే తమ ప్రాంతం అభివృద్ధి చెందాలనే ఉద్దేశంతో అధికార పార్టీలో జాయిన్ అయ్యామని వారు తెలిపారు.