KTR : మాజీ ఎమ్మెల్యేకు కేటీఆర్ పరామర్శ

దేవరకద్ర మాజీ ఎమ్మెల్యే ఆల వెంకటేశ్వర రెడ్డిని ఆదివారం మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ పరామర్శించారు. వెంకటేశ్వర్‌ రెడ్డి సోదరుడు ఆల శశి వర్ధన్ పన్నెండు రోజుల కిందట గుండెపోటుతో మరణించారు. ఈ నేపథ్యంలో మహబూబ్ నగర్ జిల్లా భూత్పూర్ మండలం అన్నాసాగర్ గ్రామంలోని ఆల వెంకటేశ్వర్ రెడ్డి నివాసానికి వెళ్లి వారి కుటుంబ సభ్యులను కేటీఆర్ పరామర్శించారు. ఈ సందర్భంగా వెంకటేశ్వర్ రెడ్డి సోదరుడి చిత్ర పటానికి పూలమాల వేసి నివాళులు అర్పించారు. అనంతరం కేటీఆర్ మాట్లాడుతూ.. ఆల శశి వర్ధన్ రెడ్డి బీఆర్ఎస్ పార్టీ బలోపేతం కోసం ఎంతో శ్రమించారని అన్నారు. పార్టీకి ఆయన లేని లోటు తీర్చలేనిదని అన్నారు. ఆల వెంకటేశ్వరరెడ్డికి అన్ని విషయాలలో శశివర్ధన్ రెడ్డి అండగా ఉండేవారని గుర్తు చేశారు. మాజీ ఎమ్మెల్యే వెంకటేశ్వర్ రెడ్డి, ఆయన సోదరుడు శశి వర్ధన్ రెడ్డి కుటుంబాలకు బీఆర్ఎస్ పార్టీ ఎల్లవేళలా అండగా ఉంటుందని భరోసా ఇచ్చారు. కాగా ఈ నెల 2న ఆల శశి వర్ధన్ రెడ్డి గుండెపోటుతో మృతి చెందగా ఆయన అంత్యక్రియలకు మాజీ మంత్రులు శ్రీనివాస్ గౌడ్, నిరంజన్ రెడ్డి, మాజీ ఎంపీలు జితేందర్ రెడ్డి, రావుల చంద్రశేఖర్ రెడ్డి, ఎంపీ మన్నే శ్రీనివాస్ రెడ్డి తదితరులు హాజరయ్యారు.