ప్రభాస్, గోపీచంద్ లను వదలను అంటున్నాడు ఆ దర్శకుడు. వరుసగా వాళ్లతోనే సినిమాలు చేయడానికి ప్రయత్నిస్తూ సక్సెస్ అవుతున్నాడు. కానీ అతను రూపొందించిన సినిమాలు మాత్రం ఆశించిన స్థాయిలో సక్సెస్ కావడం లేదు. ప్రభాస్, గోపీచంద్ ఇద్దరికీ చెరో సినిమా ఇచ్చాడు. ఇప్పుడు మళ్లీ మేచో స్టార్ తోనే సినిమాకు ప్లాన్ చేసుకుంటున్నాడు. ఇందుకోసం గోపీచంద్ కూడా ఓకే చెప్పినట్టు టాక్. ఇంతకీ ఈ దర్శకుడు ఎవరు అనే కదా మీ డౌట్. ఇంకెవరూ.. రాధాకృష్ణ. గోపీచంద్ తో జిల్ అనే సినిమాతో దర్శకుడుగా పరిచయం అయ్యాడు రాధాకృష్ణ. యూవీ క్రియేషన్స్ బ్యానర్ నిర్మించిన సినిమా ఇది. గోపీచంద్ సరసన రాశిఖన్నా హీరోయిన్ గా నటించిన ఈ మూవీ గోపీ ఇమేజ్ కు భిన్నంగా స్టైలిష్ యాక్షన్ ఎంటర్టైనర్ అనిపించుకుంది. ఈ క్రేజ్ తోనే ఏకంగా ప్రభాస్ తో ప్రాజెక్ట్ సెట్ చేసుకున్నాడు. రాధేశ్యామ్ ను కూడా యూవీ బ్యానరే ప్రొడ్యూస్ చేసింది. బట్ రాధేశ్యామ్ బాక్సాఫీస్ వద్ద దారుణంగా విఫలమైంది. దీంతో ఇక రాధాకృష్ణ కెరీర్ కు బ్రేక్ లు పడతాయనుకున్నారు. అయితే అతను తాజాగా గోపీచంద్ కు కథ చెప్పి ఒప్పించాడు అనే టాక్ వినిపిస్తోంది.
గోపీచంద్ వరుస ఫ్లాపుల్లో ఉన్నాడు. ఓ సాలిడ్ హిట్ కోసం చూస్తున్నారు. ప్రస్తుతం కన్నడ దర్శకుడు ఏ హర్షతో ‘భీమా’ అనే సినిమా చేస్తున్నాడు. ఈ మూవీ చివరి దశలో ఉంది. గోలీమార్ తర్వాత గోపీచంద్ పోలీస్ ఆఫీసర్ గా నటిస్తోన్న మూవీ ఇది. దీంతో పాటు శ్రీను వైట్ల డైరెక్షన్ లో మరో సినిమా రీసెంట్ గానే స్టార్ట్ అయింది. ఈ టైమ్ లో రాధాకృష్ణతో సినిమా అనేది కొత్తగా వినిపిస్తోన్న మాట. ఫస్ట్ మూవీ జిల్ ఓకే అనిపించినా.. ఈ దర్శకుడు రాధేశ్యామ్ లాంటి పెద్ద అవకాశాన్ని మిస్ చేసుకున్నాడు. మరి గోపీచంద్ ఇచ్చిన ఈ చాన్స్ ను అయినా నిలబెట్టుకుంటాడా లేదా అనేది చూడాలి.