Senior actress Gautami : నటి గౌతమికి హత్య బెదిరింపు.. కూతుర్ని కూడా లేపేస్తామంటూ...

ప్రముఖ దక్షిణాది నటి గౌతమిని తమిళనాడు ల్యాండ్ మాఫియా హత్య చేస్తామని బెదిరింపులకు పాల్పడుతోంది. ఆమెతోపాటు ఆమె కూతురిని కూడా హతమారుస్తామని హెచ్చరిస్తోంది. దీంతో గౌతమి చెన్నై పోలీసులకు ఫిర్యాదు చేశారు. తనకు చెందిన రూ. 25 కోట్ల విలువైన భూములను అలగప్పన్ అనే ఏజెంట్ కబ్జా చేశాడని ఆమె ఆవేదన వ్యక్తం చేశారు. గౌతమి తెలిపిన వివరాల ప్రకారం..

గౌతమికి శ్రీపెరుంబూర్‌తోపాటు పలు ప్రాంతాల్లో కోట్ల విలువైన ఆస్తులుఉన్నాయి. కేన్సర్ బారిన పడి కోలుకున్న ఆమె అవసరాల కోసం వాటిని అమ్మాలనుకున్నారు. అమ్మి పెట్టాలని అగప్పన్ అనే బిల్డర్‌ను సంప్రదించారు. భూములపై కన్నేసిన అగలప్పన్ దస్తావేజులపై సంతకాలను ఫోర్జరీ చేసి నకిలీ దస్తావేజులు సృష్టించాడు. విషయం తెసుకున్న గౌతమి నిలదీయగా చంపుతానని బెదిరిస్తున్నాడు. తనకు రాజకీయ నాయకుల అండదండలు ఉన్నాయని, భూములు తనకే వదిలేయాలని అంటున్నాడు. మాట వినకపోతే గౌతమిని, ఆమె కూతురు సుబ్బులక్ష్మిని చంపుతానని హెచ్చరిస్తున్నాడు. ఇప్పటికే రూ. 25కోట్ల విలువైన భూములను అలగప్పన్ కబ్జా చేశాడని, తనకు న్యాయం చేయాలని ఆమె చెన్నై పోలీస్ కమిషనర్‌కు విజ్ఞప్తి చేశారు. ఏపీలోని శ్రీకాకుళంలో జన్మించిన గౌతమి తెలుగు, తమిళం సహా పలుభాషా చిత్రాల్లో నటించి మంచిపేరు తెచ్చుకుంది. కమల్‌ హాసన్‌ను రెండో పెళ్లి చేసుకున్న ఆమె తర్వాత విడిపోయింది. సుబ్బులక్ష్మి ఆమెకు మొదటి భర్త, వ్యాపారి సందీప్ భాటియా ద్వారా కలిగిన సంతానం.