చరిత్ర సృష్టించిన సాత్విక్‌-చిరాగ్‌ జోడీ..ఇండోనేసియా ఓపెన్‌ టైటిల్‌ కైవసం

భారత బ్యాడ్మింటన్‌ డబుల్స్‌ జోడీ సాత్విక్‌ సాయిరాజ్‌- చిరాగ్‌ శెట్టి చరిత్ర సృష్టించింది. ఇండోనేసియా ఓపెన్‌ టైటిల్‌‌ను కైవసం చేసుకుంది. ఫైనల్లో అరొన్‌ చియా-సో వుయిక్‌ (మలేసియా) జోడీకి షాక్ ఇస్తూ.. వరుస సెట్లలో 21-17, 21-18 మ్యాచ్‌ను నెగ్గారు. తద్వారా ఇండోనేసియా ఓపెన్‌ ప్రపంచ టూర్‌ సూపర్‌ 1000 టోర్నీలో టైటిల్‌ నెగ్గిన తొలి భారత జోడీగా సాత్విక్‌-చిరాగ్‌ నిలిచారు.

టోర్నీ ఆరంభం నుంచే దుమ్మురేపుతున్న సాత్విక్ – చిరాగ్ జోడీ శుక్రవారం జరిగిన క్వార్టర్స్‌లో టాప్‌ సీడ్‌ ఫజర్‌ అల్ఫియాన్‌- మహమ్మద్‌ రియాన్‌ (ఇండోనేసియా)పై విజయం సాధించి సంచలనం సృష్టించింది. సెమీస్‌లో దక్షిణ కొరియా జోడీ కాంగ్‌ మిన్‌ హిక్‌–సియో సెంగ్‌ జె పై 17-21 21-19 21-18 తేడాతో విజయం సాధించి ఫైనల్లో అడుగుపెట్టింది. టైటిల్ పోరులోనూ సాత్విక్ – చిరాగ్ జోడీ అదరగొట్టింది. ప్రత్యర్థులకు ఏ మాత్రం అవకాశం ఇవ్వకుండా మ్యాచ్‌ను వరుస సెట్లలో ముగించి స్వర్ణం దక్కించుకుంది.ప్రస్తుత సీజన్‌లో సాత్విక్‌–చిరాగ్‌ జోడి స్విస్‌ ఓపెన్, ఆసియా చాంపియన్‌షిప్‌లో విజేతగా నిలిచి స్వర్ణ పతకాలు సాధించగా... మలేసియా ఓపెన్‌లో సెమీఫైనల్‌ చేరారు. తాజాగా ఇండోనేసియా ఓపెన్‌ టైటిల్‌‌ను కొల్లగొట్టారు.