పసికూన చేతిలో పాకిస్తాన్ ఆటగాళ్లు మరోసారి తడబడ్డారు. అందరి అంచనాలను తలకిందులు చేస్తూ వరల్డ్ కప్ కు అర్హత సాధించింన నెదర్లాండ్స్.. పాక్ ను ముప్పుతిప్పలు పెట్టింది. నెదర్లాండ్స్ బౌలర్ల దెబ్బకు పాక్ టాప్ ఆర్డర్ చాపచుట్టేసింది. దీంతో భారీ స్కోర్ చేస్తుందనుకున్న పాక్.. 286 పరుగులకే ఆలౌట్ అయింది. టాస్ ఓడి బ్యాటింగ్ చేసిన పాకిస్తాన్ 49 ఓవర్లలో 286 పరుగులు చేసి ఆలౌట్ అయింది. ఓపెనర్లు ఫకర్ జమాన్ (12), ఇమామ్ ఉల్ హక్ (15) ఫెయిల్ అవగా.. మూడో వికెట్ లో వచ్చిన కెప్టెన్ బాబర్ ఆజం (5, 18 బంతుల్లో), ఇఫ్తికార్ అహ్మద్ (9) దారుణంగా విఫలం అయ్యాడు. దీంతో పాకిస్తాన్ పీకల్లోతు కష్టాల్లో పడింది. మిడిల్ ఆర్డర్ బ్యాటర్లు రిజ్వాన్ (68), షకీల్ (68) ఆదుకోవడంతో పాక్ భారీ స్కోర్ దిశగా చేరింది. చివర్లో నవాజ్ (39), ఫాదాబ్ ఖాన్ (32) క్రీజులో నిలుచోవడంతో పాక్ 49 ఓవర్ల వరకు నిలబడింది. నెదర్లాండ్స్ బౌలర్ బాస్ డి లీడే 4 వికెట్లతో పాక్ పతనాన్ని శాసించాడు. అకర్మన్ 2 వికెట్లు తీసుకోగా.. ఆర్యన్ దత్, వాన్ బీక్, వాన్ మీకెరన్ తలా ఓ వికెట్ పడగొట్టారు.