ఉద్యోగులను ఇంటికి పంపి.. ఏఐను పెట్టుకున్న స్టార్టప్ సంస్థ

ఆర్టిఫిషియల్ ఇంటెలిజెన్స్.. మెల్లిగా అన్ని రంగాలకు పాకుతోంది. ఏఐతో లాభాలు పక్కనబెడితే.. ఉద్యోగుల భద్రతకు ముప్పు పొంచి ఉందనే ఆరోపణలు వినిపిస్తున్నాయి. ఇప్పటికే ఏఐతో పలువురు ఉద్యోగాలు కోల్పోవడం ఆందోళన కలిగించే అంశం. ఈ క్రమంలో ఓ కంపెనీ కీలక నిర్ణయం తీసుకుంది. తమ సంస్థలోని 90శాతం ఉద్యోగుల్ని తొలగించి ఏఐతో రిప్లేస్ చేసింది.

ప్రముఖ ఈ-కామర్స్ స్టార్టప్ దుకాణ్ భారీగా ఉద్యోగులను తొలగించింది. ప్రధానంగా కంపెనీ కస్టమర్ సపోర్ట్ టీమ్‌లోని 90 శాతం మంది ఉద్యోగుల స్థానంలో ఏఐ చాట్‌బాట్‌ను తీసుకుంది. ఈ విషయాన్ని కంపెనీ వ్యవస్థాపకుడు, సీఈఓ సుమిత్ షా తెలిపారు. తొలగించిన ఉద్యోగులకు అవసరమైన సహాయం అందించినట్టు స్పష్టం చేశారు.

‘‘మా సంస్థలో 90 శాతం కస్టమర్‌ సపోర్ట్ టీమ్‌ను ఏఐతో భర్తీ చేశాం. ఈ నిర్ణయం కష్టమైందే అయినా తప్పడంలేదు. సంస్థ లాభాలను పెంచుకోవడమే లక్ష్యంగా ఈ నిర్ణయం తీసుకున్నాం. దీనివల్ల కస్టమర్‌కేర్‌ నిర్వహణ కోసం కంపెనీ ఖర్చు చేసే మొత్తం 85 శాతం తగ్గింది. అదేవిధంగా కస్టమర్ సేవలను అందించే సమయం 2 గంటల నుంచి 3 నిమిషాలకు తగ్గింది’’ అని సుమిత్ ట్వీట్ చేశారు. ఈ ట్విట్ పై నెటిజన్లు తీవ్రంగా మండిపడుతున్నారు. మీకు అసలు జాలి దయ లేదంటూ ఆగ్రహాన్ని వ్యక్తం చేస్తున్నారు.