డిజిటల్ డ్రైవింగ్ లైసెన్స్లు.. వాళ్లకు రేపటి నుంచి అమలు

కేంద్ర ప్రభుత్వం పరివాహన్ సేవా పేరుతో దేశవ్యాప్తంగా డిజిటల్ డ్రైవింగ్ లైసెన్స్ విధానాన్ని అమలు చేస్తున్న విషయం తెలిసిందే. డ్రైవింగ్ లైసెన్స్ డిజిటల్ కాపీ విషయంలో వాహనదారుల ఇబ్బందులను గుర్తించి, ఇక నుంచి ఫోన్‌లోనే డ్రైవింగ్ లైసెన్స్‌ను డౌన్‌లోడ్ చేసుకునేలా ఓ వెబ్‌సైట్‌ను అందుబాటులోకి తీసుకొచ్చింది. ఈ వెబ్‌సైట్ ద్వారా ఏదైనా సందర్భంలో రోడ్డుపై వెళ్తున్నప్పుడు పోలీసులు వాహనాన్ని ఆపి, డ్రైవింగ్ లైసెన్స్ అడిగితే వెంటనే మొబైల్ ఫోన్‌లోనే అక్కడికక్కడే డౌన్‌లోడ్ చేసి లైసెన్స్‌ను చూపించేలా వెబ్‌సైట్‌ను క్రియేట్ చేసింది. ఈ విధానాన్ని ఆంధ్రప్రదేశ్ ప్రభుత్వం స్వాగతించింది. పేపర్ లెస్ డ్రైవింగ్ లైసెన్స్ విధానాన్ని శుక్రవారం (ఆగస్టు 4) నుంచి అమలు చేస్తున్నట్లు ఏపీ రాష్ట్ర రవాణా శాఖ ఉత్తర్వులు జారీ చేసింది.

మారుతున్న కాలానికి అనుగుణంగా.. డిజిటలైజేషన్ నేపథ్యంలో తీసుకొచ్చిన ఈ విధానం ద్వారా చాలామంది వాహన దారులకు మేలు జరుగుతుందని అధికారులు తెలిపారు. డిజి లాకర్ తో పాటు ఎం- పరివాహన్ అప్లికేషన్ లో అందుబాటులోకి తీసుకొస్తున్నట్లు వివరించారు. ఇక నుంచి పోలీస్ అధికారులు లైసెన్స్ అడిగితే.. పేపర్ లెస్ గా యాప్ లో అప్పటి కప్పుడు డౌన్ లోడ్ చేసుకుని చూపించొచ్చు.