Krishna Express: ప్రయాణికులకు అలర్ట్.. కృష్ణా ఎక్స్ప్రెస్ రద్దు
కృష్ణా ఎక్స్ప్రెస్ కోసం ఎదురుచూసే తిరుమల భక్తులకు అలర్ట్. ఈరోజు లేదా రేపు తిరుమలకి రైలు ప్రయాణం ద్వారా వెళ్లాలనుకుంటే మాత్రం మీ ప్రయాణాన్ని వాయిదా వేయడం మంచిది. లేదంటే మరో ప్రత్యామ్నాయ మార్గాన్ని(ప్రయాణాన్ని) ఎంచుకోవాల్సి ఉంటుంది. ఆదిలాబాద్‌- తిరుపతి మధ్య కాజీపేట మీదుగా నడిచే కృష్ణా ఎక్స్ప్రెస్ ఈనెల 10, 11 తేదీలలో రద్దు కావడమే అందుకు ముఖ్య కారణం. సికింద్రాబాద్‌ డివిజన్ పరిధిలో జరిగే ఇంటర్‌లాకింగ్‌ పనుల కారణంగా ఈ రెండ్రోజులు కృష్ణా ఎక్స్ప్రెస్ ను రద్దు చేస్తున్నట్లు అధికారులు తెలిపారు. ఇప్పటికే టికెట్లు రిజర్వేషన్‌ చేసుకున్న వారికి తిరిగి నగదు చెల్లిస్తామని వివరించారు. గడిచిన రెండు వారాల్లో కృష్ణా ఎక్స్‌ప్రెస్‌ను రద్దు చేయడం ఇది రెండోసారి. ఈ కృష్ణా ఎక్స్‌ప్రెస్‌ను పేదవాళ్ల రైలుగా పిలిచుకుంటుంటారు. తిరుమల వెళ్లడానికి చాలామంది ప్రయాణికులు ఈ రైలుకే ప్రాధాన్యమిస్తారు.
మరోవైపు మరికొన్ని రైళ్లను కూడా రద్దు చేశారు. కాజీపేట- డోర్నకల్‌ మధ్య నడిచే డోర్నకల్‌ ప్యాసింజరు, సికింద్రాబాద్‌- వరంగల్‌ మధ్య నడిచే పుష్‌పుల్‌, కాజీపేట -బల్లార్షా మధ్య నడిచే బల్లార్షా ఎక్స్ప్రెస్ రైళ్ల రద్దును ఈనెల 15 వరకు పొడిగిస్తున్నట్లు అధికారులు తెలిపారు. ప్రయాణికులు ఈ రైళ్ల రద్దును దృష్టిలో పెట్టుకుని జర్నీ ప్లాన్ చేసుకోవాలని రైల్వేశాఖ అధికారులు సూచించారు. అంతేకాదు విజయవాడ డివిజన్ పరిధిలో కూడా కొన్ని రైళ్లను రద్దు చేసిన సంగతి తెలిసిందే. ఈ రైళ్ల రద్దుతో ప్రయాణికులు తీవ్ర ఇబ్బందులు ఎదుర్కొంటున్నారు.