ఏపీలో టీడీపీ ఎన్నికలకు సిద్ధమవుతోంది. ఎప్పుడు ఎలక్షన్స్ వచ్చినా సిద్ధమన్న చంద్రబాబు..అందుకు తగ్గుట్టుగానే ముందుకు దూసుకుపోతున్నారు. ఇటీవల మహానాడులో మినీ మేనిఫెస్టో ప్రకటించిన టీడీపీ..నియోకవర్గాల ఇన్చార్జిల విషయంలోనూ దూకుడు పెంచింది. తాజాగా మరో కీలక నిర్ణయం తీసుకుంది. సత్తెనపల్లి నియోజకవర్గ ఇన్చార్జిగా కన్నా లక్ష్మీనారాయణను నియమించింది. టీడీపీ రాష్ట్ర అధ్యక్షుడు అచ్చెన్నాయుడు ఓ ప్రకటనలో ఈ విషయాన్ని వెల్లడించారు. దీంతో అంబటి రాంబాబుపై టీడీపీ అభ్యర్థిగా కన్నా లక్ష్మీనారాయణ బరిలో దిగడం దాదాపు ఖాయమే. సత్తెనపల్లిపై టికెట్‌పై ఆశల పెట్టుకున్న జీవీ ఆంజనేయులు, కోడెల శివప్రసాద్ తనయుడు కోడెల శివరామకృష్ణలకు నిరాశ ఎదురైంది. అంబటి రాంబాబు కాపు సామాజిక వర్గానికి చెందిన నాయకుడు కావడంతో..అదే కులానికి చెందిన కన్నా లక్ష్మీనారాయణను టీడీపీ బరిలోకి దించుతోంది.
ఇటీవలే మాజీమంత్రి కన్నా లక్ష్మీనారాయణ తెలుగుదేశం పార్టీలో చేరారు. బీజేపీకి గుడ్ బై చెప్పి సైకిలెక్కారు. గతంలో కన్నా లక్ష్మీనారాయణ పెదకూరపాడు నియోజకవర్గం నుంచి వరుసగా అయిదుసార్లు గెలిచారు. 2009లో గుంటూరు వెస్ట్‌ నుంచి పోటీ చేసి గెలుపొందారు. 2019 ఎన్నికల్లో బీజేపీ అభ్యర్థిగా నరసరావుపేట నుంచి లోక్‌సభకు పోటీ చేసి ఓటమి చవి చూశారు.