Upender Reddy : అనితారెడ్డి ఫిర్యాదుతో.. బీఆర్ఎస్ మాజీ ఎమ్మెల్యేపై పోలీస్ కేసు

బీఆర్ఎస్ పార్టీ నేత, పాలేరు మాజీ ఎమ్మెల్యే కందాల ఉపేందర్ రెడ్డిపై బంజారాహిల్స్ ఠాణాలో కేసు నమోదైంది. షేక్ పేట్ తహసీల్దార్ అనితారెడ్డి ఇచ్చిన ఫిర్యాదుతో పోలీసులు కేసు నమోదు చేశారు. బంజారాహిల్స్ లోని ఓ స్థలానికి సంబంధించిన వ్యవహారంలో ఉపేందర్ రెడ్డిపై కేసు పెట్టారు. పోలీసులు తెలిపిన వివరాల ప్రకారం.. బంజారాహిల్స్‌ రోడ్‌ నం.3, ప్లాట్‌ నంబరు 8-సీ పేరుతో ఉన్న 2,185 చదరపు మీటర్ల ప్రభుత్వ భూమిని ఉపేందర్ రెడ్డితో పాటు పలువురు కబ్జా చేశారు. ఆ స్థలంలో ‘దీప్తి అవెన్యూ ప్రైవేట్‌ లిమిటెడ్‌’ సంస్థలో నిర్మాణాలు చేపట్టారు. గతంలో ప్లాట్ నం.8-డీలో షౌకతున్నీసా పేరుతో ఉన్న స్థలాన్ని కొనుగోలు చేసిన ఉపేందర్ రెడ్డి.. ఇప్పుడు ప్లాట్‌ నంబరు 8-సీ తనదిగా చెప్తున్నారు.

కాగా శనివారం తహసీల్దార్ అనితారెడ్డి ఆ స్థలాన్ని పరిశీలించగా.. ప్రభుత్వం భూమి బోర్డ్ తొలగించి, షెడ్లు నిర్మించి వైన్ షాపులు నిర్వహిస్తున్నట్లు గుర్తించారు. పోలీసుల సహకారంతో అనితారెడ్డి.. ఆ అక్రమ నిర్మాణాలను సీజ్ చేశారు. అనితారెడ్డి ఇచ్చిన ఫిర్యాదుతో పోలీసులు... ఐపీసీ సెక్షన్లు 447, 427, 467, 468, 471; సెక్షన్‌ 3 ఆఫ్‌ పీడీపీపీ చట్టం కింద ఉపేందర్ రెడ్డిపై కేసు నమోదు చేసి దర్యాప్తు చేస్తున్నారు.