అంబులెన్స్ ను ఢీకొట్టిన మంత్రి కాన్వాయ్

కేరళ విద్యాశాఖ మంత్రి వి శివన్ కుట్టి కాన్వయ్ ఓ అంబులెన్స్ ను ఢీ కొట్టింది. ఈ ప్రమాదంలో అంబులెన్స్ వ్యాన్ కిందపడడంతో ముగ్గురికి తీవ్ర గాయాలయ్యాయి. ఈ ఘటన కొట్టారకరలోని పులుమన్ జంక్షన్ దగ్గర చోటు చేసుకుంది. ఈ ఆక్సిడెంట్ కు సంబంధించిన దృశ్యాలు ట్రాఫిక్ భద్రత సీసీ కెమెరాలో రికార్డు అయ్యాయి. ఈ వీడియోలో ఒక పక్కనుంచి వస్తున్న అంబులెన్స్(ambulance) చూసుకోకుండా అటుగా వస్తున్న మంత్రి కాన్వయ్ ఢీ కొట్టింది. అలాగే కంట్రోల్ కానీ ఆ వాహనం ఎదురుగా వస్తున్న బైక్ మీదకు దూసుకొచ్చింది. గమనించిన బైక్ నడిపే వ్యక్తి తన వేగాన్ని అదుపుచేసుకున్నాడు. ఫలితంగా పెద్ద ప్రమాదమే తప్పింది.

అంతేకాదు ఈ ప్రమాదంలో పక్కనే ఉన్న పోలీసుకు కూడా తృటిలో ప్రాణహాని తప్పింది. కూడలిలో విధులు నిర్వహిస్తున్న పోలీసుపై పల్టీ పడిన అంబులెన్స్ దూసుకొచ్చింది. ఏ మాత్రం ఏమరపాటుగా ఉన్నా చాలా ఘోరం జరిగేది. ఘటన జరిగిన తరువాత కొద్దిసేపు అక్కడ ట్రాఫిక్ నిలిచిపోయినట్లు సమాచారం. కాన్వాయ్ దిగి మంత్రి అక్కడినుంచి వెళ్లిపోయాడు. ఈ ఘటనలో ముగ్గురు గాయపడ్డారని, గాయపడిన వారిని మంత్రి పరామర్శించి వెళ్లాడని సమాచారం. ప్రస్తుతం ఇందుకు సంబంధించి ఫొటోలు, వీడియోలు నెట్టింట వైరల్ గా మారాయి.