బ్రిడ్జ్​ పైనుంచి రైల్వే ట్రాక్​పై పడిన బస్సు.. నలుగురు మృతి

రాజస్థాన్‌లోని దౌసాలో ఆదివారం అర్థరాత్రి ఘోర ప్రమాదం జరిగింది. హరిద్వార్ నుంచి ఉదయ్‌పూర్ వెళ్తున్న బస్సు దౌసాలోని కల్వర్టు నుంచి రైల్వే ట్రాక్‌పై పడిపోయింది. ఈ ప్రమాదంలో 4 మంది మృతి చెందగా, 28 మంది గాయపడ్డారు. జైపూర్ సమీపంలోని దౌసా వద్ద జాతీయ రహదారి నెం. 21పై ఈ ఘోర ప్రమాదం జరిగింది. బస్సు డ్రైవర్‌ నియంత్రణ కోల్పోవడమే ప్రమాదానికి కారణమని తెలుస్తోంది. దౌసా కలెక్టరేట్ సమీపంలోని సర్కిల్ వద్ద ఈ ప్రమాదం జరిగింది.

ప్రమాదానికి గురైన బస్సు హరిద్వార్ నుండి ఉదయ్‌పూర్‌కు వెళ్తోందని డిప్యూటీ సూపరింటెండెంట్ ఆఫ్ పోలీస్ బజరంగ్ సింగ్ షెకావత్ తెలిపారు. నిన్న అర్ధరాత్రి 2:15 గంటల ప్రాంతంలో కలెక్టరేట్ సర్కిల్ వద్ద కల్వర్టుపై నుంచి వెళుతున్న బస్సు అదుపు తప్పి ఆర్ఓబీ గోడను ఢీకొట్టి కింద ఉన్న రైల్వే ట్రాక్‌పై పడింది. దాదాపు 50 అడుగుల ఎత్తు నుంచి బస్సు పడిపోయింది. ఈ ప్రమాదం నుంచి స్థానికుల ద్వారా తెలుసుకున్న పోలీసులు వెంటనే అక్కడికి చేరుకొని.. రెస్క్యూ టీం సహాయంతో బస్సులో ప్రయాణిస్తున్న వారిని బయటకు తీశారు. అదే సమయంలో ముందుజాగ్రత్తగా ఇరువైపులా రైలు రాకపోకలను నిలిపివేశారు. ఈ ప్రమాదంలో ముగ్గురు అక్కడికక్కడే మృతి చెందగా, ఒకరు ఆస్పత్రికి తీసుకెళ్లే సమయంలో మృతి చెందారు.

దౌసా ప్రమాదంలో గాయపడిన వారిని జిల్లా ఆసుపత్రికి తరలించగా, విషమ పరిస్థితిలో ఉన్న మరొకరిని జైపూర్‌కు తరలించారు. ప్రమాదం జరిగిన తర్వాత సబ్ డివిజనల్ అధికారిని సంఘటనా స్థలానికి పంపి ప్రమాద స్థలాన్ని పరిశీలించినట్లు దౌసా ఎస్‌డిఎం రాజ్‌కుమార్ కస్వా తెలిపారు. అదే సమయంలో క్షతగాత్రులకు చికిత్స చేయాలని వైద్యులకు సూచనలు చేశారు. ప్రమాదం తర్వాత, కలెక్టర్ కమర్ ఉల్ జమాన్ కూడా సహాయక చర్యలను పరిశీలించారు.