స్టేజ్‌పై కచేరి.. రూ.లక్షలు వెదజల్లారు..

గుజరాత్‌కు చెందిన ఫోక్ సింగర్ ఊర్వశీ రదాదియాపై డబ్బుల వర్షం కురిసింది. ఆమె పాటకు మెచ్చిన అభిమానులు.. స్టేజీ మీద ఆమె పాడుతున్నంతసేపు అభిమానులు ఆమెపై కరెన్సీ నోట్లు వెదజల్లుతూనే ఉన్నారు. బకెట్లతో డబ్బులు తీసుకొచ్చి ఆమెపై కుమ్మరించారు. దీంతో ఆ వేదిక మొత్తం నోట్లతో నిండిపోయింది. అందుకు సంబంధించిన వీడియో సోషల్ మీడియాలో వైరల్‌గా మారింది. ఆ అభిమానాన్ని చూసిన నెటిజన్లు ఆశ్చర్యపోతున్నారు. ఈ కార్యక్రమం ద్వారా వచ్చిన రూ.లక్షలను గోశాల నిర్మాణం కోసం ఉపయోగించనున్నట్లు ట్రస్ట్‌ నిర్వాహకులు తెలిపారు.

గతంలో కూడా ఊర్వశీకి ఇలాంటి అరుదైన అనుభవమే ఎదురైంది. అహ్మదాబాద్‌లో ఓ వివాహ వేడుకకు హాజరైన ఊర్వశీ.. ఆ కార్యక్రమంలో వేదికపై కూర్చొని ఆమె హార్మోనియా వాయిస్తూ పాటలు పాడారు. దీంతో అక్కడున్న అభిమానులు ఒక్కసారిగా ఊగిపోయారు. నోట్ల కట్టలను తీసి ఆమెపై చల్లారు. మరికొందరైతే బకెట్ల నిండా డబ్బును నింపి.. ఆమెపై గుమ్మరించారు. ఆ సమయంలో డబ్బంతా ఆమె మీద పడడంతో అదంతా పక్కకు తీసి ప్రదర్శన చేపట్టారు. ఈ వీడియోను ఇన్‌స్ట్రాగ్రామ్‌లో పోస్ట్‌ చేసిన ఆమె అభిమానుల ప్రేమకు ధన్యవాదాలు తెలిపారు.