కేంద్ర ఆర్థిక శాఖ మంత్రి నిర్మలా సీతారామన్ కుమార్తె వివాహం... ఎలాంటి హంగు ఆర్భాటాలు లేకుండా అత్యంత నిరాడంబరంగా జరిగింది. అతికొద్ది మంది సన్నిహితుల మధ్యే తన కుమార్తె వివాహం జరిపించారు నిర్మల. అధికారికంగా ఈ విషయాన్ని ఆమె ప్రకటించకున్నా.. వివాహానికి సంబంధించిన ఫొటోలు బయటకు వచ్చాయి.
పరకాల ప్రభాకర్- నిర్మలా సీతారామన్ కుమార్తె వాంగ్మయి వివాహం.. ప్రతీక్ అనే వ్యక్తితో అతి కొద్ది మంది కుటుంబ సభ్యుల సమక్షంలో జరిగింది. బెంగళూరులోని నిర్మలా సీతారామన్ ఇంట్లోనే ఈ వివాహం జరిపించారు. తమిళ బ్రాహ్మణ సంప్రదాయం ప్రకారం వివాహం సాగింది. బుధవారం ఈ వేడుకను పూర్తి చేశారు. కొద్ది మంది కుటుంబ సభ్యులు, బంధువులు మాత్రమే ఈ వేడుకకు హాజరయ్యారు. రాజకీయ ప్రముఖులు ఎవరూ ఈ కార్యక్రమానికి రాలేదని తెలిసింది. నిర్మలా సీతారామన్ కుటుంబ సభ్యులు ఈ వివాహానికి సంబంధించిన వివరాలను అధికారికంగా బయటకు వెల్లడించలేదు. కానీ, వివాహానికి సంబంధించిన ఫొటోలు సామాజిక మాధ్యమాల్లో వైరల్గా మారాయి.
పరకాల వాంగ్మయి.. ప్రఖ్యాత ఢిల్లీ యూనివర్సిటీ నుంచి ఇంగ్లీష్ లో మాస్టర్స్ డిగ్రీ పూర్తి చేశారు. జర్నలిజంలోనూ ఆమెకు డిగ్రీ ఉంది. నార్త్వెస్ట్ యూనివర్సిటీలోని మెడిల్ స్కూల్ ఆఫ్ జర్నలిజం నుంచి పట్టా సాధించారు. జర్నలిజంలో ఎంఎస్ డిగ్రీ పూర్తి చేశారు. ప్రస్తుతం ఢిల్లీ కేంద్రంగా పని చేస్తోన్న ఓ జాతీయ దినపత్రికలో రిపోర్టర్‌గా పని చేస్తోన్నారు. ప్రత్యేకించి- ఆర్ట్, లైఫ్ స్టైల్, టెక్నాలజీ, సాహిత్యం మీద వార్తలను రాస్తుంటారు.