Revanth Reddy : ఢిల్లీలో రేవంత్ బిజీబిజీ.. కేంద్రమంత్రులు, ఏఐసీసీ పెద్దలతో భేటీ..

సీఎం రేవంత్ రెడ్డి నిన్న సాయంత్రం ఢిల్లీ వెళ్లారు. ఇవాళ ఆయన బిజీబిజీగా గడపనున్నారు. ఏఐసీసీ పెద్దలు, కేంద్రమంత్రులతో భేటీ కానున్నారు. రాష్ట్రానికి సంబంధించిన అంశాలపై మంత్రులతో కలిసి కేంద్రమంత్రులను సీఎం కలవనున్నారు. మధ్యాహ్నం 2గంటలకు కేంద్ర రోడ్డు, రవాణా శాఖ మంత్రి నితిన్ గడ్కరీని సీఎం బృందం కలవనుంది. రాష్ట్రంలోని రోడ్ల అభివృద్ధిపై చర్చించనున్నారు. ఇతర కేంద్రమంత్రులతోనూ రేవంత్ భేటీ కానున్నారు.

ఏఐసీసీ పెద్దలు ఖర్గే, కేసీ వేణుగోపాల్లతో రేవంత్ భేటీ కానున్నారు. లోక్ సభ అభ్యర్థులు, కార్పొరేషన్ చైర్మన్ల భర్తీపై చర్చిస్తారు. ఎన్నికలకు ముందే కార్పొరేషన్ పదవులను భర్తీ చేసే అవకాశం ఉంది. తద్వారా పార్టీ కేడర్ మరింత ఉత్సాహంతో పనిచేస్తారని అధిష్టానం భావిస్తోంది. అదేవిధంగా కేబినెట్ విస్తరణపైనా హైకమాండ్తో చర్చించనున్నారు. ఇప్పటి వరకు ఆదిలాబాద్, నిజామాబాద్ జిల్లాలకు కేబినెట్లో చోటు లభించలేదు. దీంతో మంత్రివర్గ విస్తరణలో ఈ జిల్లాలకు ప్రాధాన్యత ఇచ్చే అవకాశం ఉన్నట్లు సమాచారం. ఉమ్మడి ఆదిలాబాద్ జిల్లా నుంచి ప్రేమ్ సాగర్ రావు, వివేక్ బ్రదర్స్ రేసులో ఉన్నారు. అటు నిజామాబాద్ జిల్లా నుంచి మదన్ మోహన్ రావు, సుదర్శన్ రెడ్డి కేబినేట్ పోటీలో ఉన్నారు. రేవంత్ రెడ్డి ఢిల్లీ టూర్ తర్వాత వీటిపై స్పష్టత వచ్చే అవకాశం ఉంది.