నేను ఇక్కడ బతుకమ్మ స్టార్ట్ చేసినపుడు సగం మంది పుట్టలే.. జగ్గారెడ్డి

సంగారెడ్డిలో బతుకమ్మ వేడుకల వేళ పోలీసులు, అధికారులపై స్థానిక ఎమ్మెల్యే, కాంగ్రెస్ నేత జగ్గారెడ్డి ఫైర్ అయ్యారు. పట్టణంలోని మహబూబ్ సాగర్ చెరువు కట్టపై నిర్వహించిన బతుకమ్మ సంబురాల్లో జగ్గారెడ్డి పాల్గొని ప్రత్యేక పూజా కార్యక్రమాలు నిర్వహించారు. అనంతరం అక్కడికి వచ్చిన మహిళలను ఉద్దేశించి జగ్గారెడ్డి మాట్లాడారు. దీంతో అక్కడే ఉన్న పోలీసులు వీడియో తీశారు. అది గమనించిన జగ్గారెడ్డి.. పోలీసులపై తీవ్ర స్థాయిలో ఫైరయ్యారు. జగ్గారెడ్డి మాట్లాడితే వీడియోలు తీస్తారు.. బీఆర్ఎస్ నాయకుల మాట్లాడితే వీడియోలు తీయరా? అంటూ ప్రశ్నించారు.

తాను ఇక్కడ బతుకమ్మ స్టార్ట్ చేసినపుడు సగం మంది పుట్టలేదని మండిపడ్డారు. ఎవరు చెబితే వీడియోలు తీస్తున్నారని పోలసులపై జగ్గారెడ్డి ఆగ్రహం వ్యక్తం చేశారు. 'మనం ఎప్పుడూ బతుకమ్మ పండుగలో స్పీచ్‌లు ఇవ్వలేదు. జగ్గారెడ్డి మాట్లాడితే పోలీసులు వీడియో తీస్తారు. కానీ బీఆర్ఎస్ నాయకులు మాట్లాడితే వీడియో తీయరు.. ఏం జరుగుతుంది సంగారెడ్డిలో.. ఇదేం రాజకీయం.. నేను ఇక్కడ బతుకమ్మ స్టార్ట్ చేసిన్నపుడు సగం మంది పుట్టలేదు.

గ్రౌండ్‌లో పటాకులు తక్కువ చేసిండ్రు, ఆర్కేస్ట్రా తీసేసారు. అసలు బ్యాక్ గ్రౌండ్‌లో ఏం జరుగుతుంది ? ఎవరు చెపితే వింటున్నారు? ఎవరు చెపితే ఇదంతా చేస్తున్నారు. అంటే కోడ్ అడ్డం పెట్టుకొని జగ్గారెడ్డిని ఆపే ప్రయత్నం చేస్తున్నారా ? పోలీసులు వీడియోలు తీసి ప్రొసీడింగ్స్ ఆఫీసర్స్‌కి పంపిస్తారా ? ప్రొసీడింగ్ ఆఫీసర్స్‌కి పంపించి జగ్గారెడ్డిని ఎలా అడ్డుకోవాలి.. ఎన్నికలో ఎలా నిలబడకుండా చేయాలి? ఇదేనా పోలీసులు చేసేది.. ఇదేం రాజకీయం..ఇంత మంది స్పీచ్ లు ఇస్తుంటే ఎందుకు ఆపలేదు' అని జగ్గారెడ్డి పోలీసులపై తీవ్ర స్థాయిలో ఫైరయ్యారు.