సికింద్రాబాద్ బోయిన్‌పల్లిలో మద్యం మత్తులో ఓ యువతి పోలీసులకు చుక్కలు చూపించింది. రెండు గంటల పాటు బోయిన్ పల్లి ప్రధాన రహాదారి పై హంగామా సృష్టించింది. పోలీసులను బండబూతులు తిడుతూ విరుచుకుపడింది. అప్పటివరకూ ఓపిక పట్టిన పోలీసులు.. చివరకు ఆ యువతిని స్టేషన్‌కు తరలించారు.
ఓ ఈవెంట్‌కు వెళ్తున్న యువతి మిత్రులతో కలిసి మద్యం సేవించి కారును వేగంగా డ్రైవ్ చేసింది. జూబ్లీ బస్ స్టేషన్ వద్ద వేగంగా కారు నడపడం చూసి అనుమానం కలిగిన ట్రాఫిక్ పోలీసులు.. ఆ వాహనాన్ని రెండు కిలో మీటర్లు వెంబడించారు. చివరకు ఆమెను ఆపేందుకు యత్నించిన కానిస్టేబుల్ను యువతి కారుతో ఢీ కొట్టి వెళ్లిపోయింది. చివరకు తాడ్బండ్ సమీపంలో కారును ట్రాఫిక్ పోలీసులు అడ్డుకున్నారు. పోలీసులతో యువతి వివాదానికి దిగడంతో దాదాపు రెండు గంటల పాటు బోయిన్పల్లి మార్గంలో వాహనాల రాకపోకలు నిలిచిపోయాయి. యువతిపై పోలీసులు డ్రంక్‌ అండ్‌ డ్రైవ్ కేసుతో పాటు న్యూసెన్స్ కేసు నమోదు చేసి స్టేషన్‌కు తరలించారు.