హైదరాబాద్ 100 శాతం మురుగునీటి శుద్ధి చేసే తొలి నగరంగా చరిత్ర సృష్టించబోతోందని మంత్రి కేటీఆర్ చెప్పారు. దేశంలో ఏ నగరానికి లేని ప్రత్యేకత హైదరాబాద్‌కు ఉందన్నారు. హైదరాబాద్ నార్సింగి వద్ద ఓఆర్‌ఆర్‌పై నిర్మించిన ఇంటర్ చేంజ్‌ను ఆయన ప్రారంభించారు. రూ. 29.50 కోట్లతో ఈ ఇంటర్ చేంజ్‌ నిర్మించామని.. ఓఆర్‌ఆర్‌పై ఇది 20వ ఇంటర్ చేంజ్‌ అని చెప్పారు. ఔటర్‌పై స్పీడ్‌ లిమిట్‌ను 120 కిలోమీటర్లకు పెంచామన్నారు.
హైదరాబాద్ అభివృద్ధికి నిర్విరామంగా కృషి చేస్తున్నామని కేటీఆర్ అన్నారు. దేశంలోని ఏ మెట్రో నగరానికి లేని ప్రత్యేకత సెప్టెంబర్‌ 2 నాటికి హైదరాబాద్‌కు రాబోతోందని చెప్పారు. నగరంలో 100 శాతం మురుగునీటి శుద్ధి చేయబోతున్నామని స్పష్టం చేశారు. మురుగునీటి శుద్ధి కోసం దాదాపు రూ.3,866 ఖర్చుతో కొత్తగా 31 మురుగునీటి శుద్ధి ప్లాంట్ల నిర్మాణానికి శ్రీకారం చుట్టామన్నారు. సెప్టెంబర్‌ నాటికి దశలవారిగా దేశంలోనే 100 శాతం మురుగునీటిని శుద్ధిచేస్తున్న తొలి నగరంగా హైదరాబాద్ చరిత్ర సృష్టిస్తుందన్నారు.
రెండున్నరేళ్లలో శంషాబాద్‌ ఎయిర్‌పోర్టు మెట్రోను పూర్తిచేస్తామని కేటీఆర్ చెప్పారు. బీహెచ్‌ఈఎల్‌ నుంచి కందుకూరు ఫార్మాసిటీ వరకు మెట్రో రైలు నిర్మాణానికి ప్రణాళికలు రూపొందిస్తున్నట్లు తెలిపారు. మూసీ నదిపై 14 బ్రిడ్జిల నిర్మాణాలకు అనుమతులిచ్చామని.. త్వరలోనే వాటికి శంకుస్థాపన చేస్తామన్నారు. శంషాబాద్‌ నుంచి నాగోల్‌ వరకు 55 కిలోమీటర్ల మేర మూసీపై ఎక్స్‌ప్రెస్‌ వే నిర్మిస్తామన్న మంత్రి.. దానికి రూ.15 వేల కోట్ల వరకు ఖర్చవుతుందని చెప్పారు. కరోనా వల్ల మూసీ సుందరీకరణను అనుకున్నంత వేగంగా చేయలేకపోయామని.. త్వరలోనే మూసీ నదిపై స్కైవే నిర్మిస్తామని తెలిపారు.
అంతర్జాతీయ ప్రమాణాలతో సైకిల్‌ట్రాక్‌ ఏర్పాటు చేస్తున్నామన్న కేటీఆర్ ఆగస్టులో దానిని ప్రారంభిస్తామని చెప్పారు. హైదరాబాద్ అభివృద్ధికి సహకరించాలని కేంద్రాన్ని కోరినా స్పందించడం లేదని మండిపడ్డారు. మెహిదీపట్నంలో స్కైవాక్‌, కొత్త లింక్‌ రోడ్లకు సహకారం, జూబ్లీ బస్టాండ్‌ వరకు స్కైవాక్‌ కోసం భూములు కేటాయించాలని రక్షణ మంత్రి రాజ్నాథ్సింగ్ను కోరామన్నారు. భూమికి బదులు భూమి ఇస్తామన్నప్పటికీ కేంద్రం నుంచి స్పందన లేదని విమర్శించారు.