హెలికాప్టర్లో సాంకేతిక లోపం.. రోడ్డు మార్గంలో కామారెడ్డికి రేవంత్..

టీపీసీసీ చీఫ్ రేవంత్ రెడ్డి ఎన్నికల ప్రచారంలో దూసుకుపోతున్నారు. వరుస సభలతో బిజీగా ఉన్నారు. క్యాంపెయినింగ్లో భాగంగా శనివారం 3 సభల్లో పాల్గొనాల్సి ఉంది. అయితే చివరి నిమిషంలో రేవంత్ ప్రయాణించాల్సిన హెలికాప్టర్లో సాంకేతిక లోపం తలెత్తింది. దీంతో సభలు ఆలస్యంగా ప్రారంభంకానున్నాయి.

ప్రచారంలో భాగంగా రేవంత్ రెడ్డి ఈ రోజు కామారెడ్డి నియోజకవర్గంలో నిర్వహించే 3 సభలలో పాల్గొననున్నారు. అయితే చివరి నిమిషంలో హెలికాప్టర్ లో లోపం తలెత్తడంతో ఆయన రోడ్డు మార్గంలో కామారెడ్డికి బయలుదేరారు. దీంతో మధ్యాహ్నం 3 గంటలకు ప్రారంభంకావాల్సిన తొలి సభ ఇంకా షురూ కాలేదు. కొత్త షెడ్యూల్ ప్రకారం రేవంత్ రెడ్డి రాత్రి 7 గంటలకు బిక్కనూరులో, 8 గంటలకు రాజంపేటలో, 9 గంటలకు చిన్నమల్లారెడ్డి సభల్లో ప్రసంగించనున్నారు.