ఇంటర్మీడియట్ అభ్యర్థులకు అలర్ట్.. తెలంగాణ ఎంసెట్ ఎప్పుడంటే..

తెలంగాణ ఇంటర్మీడియట్‌ సెకండ్ ఇయర్ చదువుతున్న విద్యార్థులకు అలర్ట్. ఇంటర్మీడియట్ అభ్యర్థులు ఆసక్తిగా ఎదురుచూస్తున్న తెలంగాణ ఎంసెట్‌( TS EAPCET-2024) 2024 పరీక్ష షెడ్యూల్‌ కాసేపటి క్రితమే విడుదలైంది. ఫిబ్రవరి 21న నోటిఫికేషన్‌ తెలంగాణ ఎంసెట్‌ 2024 పూర్తిస్థాయి నోటిఫికేషన్‌ విడుదల కానుంది. ఈ మేరకు సెట్‌ కన్వీనర్ ప్రొఫెసర్‌ డీన్‌ కుమార్‌ వెల్లడించారు. ఫిబ్రవరి 26 నుంచి ఏప్రిల్‌ 6 వరకు దరఖాస్తులు స్వీకరించనున్నట్లు ఓ ప్రకటన లో తెలిపారు. మే 9 నుంచి 12 వరకు పరీక్షలు జరగనున్నాయి. ఇటీవల ఎంసెట్‌ పేరును ఈఏపీసెట్‌గా మారుస్తూ.. ఉన్నత విద్యా మండలి నిర్ణయం తీసుకుంది. జేఎన్‌టీయూ-హైదరాబాద్‌ ఆధ్వర్యంలో ఈ పరీక్ష జరగనుంది.

గతంలో ఇంజినీరింగ్, మెడికల్‌లో ప్రవేశాలకు ఎంసెట్‌లో సాధించిన ర్యాంకుల ఆధారంగా సీట్లు భర్తీ చేసే వారు. కానీ, ప్రస్తుతం మెడిసిన్, డెంటల్, యునానీ, ఆయుర్వేద, హోమియో కోర్సుల్లో ప్రవేశాలకు నీట్‌ను నిర్వహిస్తున్నారు. నేషనల్ టెస్టింగ్ ఏజెన్సీ జాతీయ స్థాయిలో ఈ పరీక్ష నిర్వహిస్తోంది. ఈ నేపథ్యంలో మెడిసిన్(ఎం) అనే పదాన్ని ఎంసెట్ నుంచి తొలగించింది. దీంతో ఎంసెట్ కు బదులు ఎప్‌సెట్‌గా మారనుంది. ఇంజినీరింగ్, అగ్రికల్చర్, ఫార్మసీలో ప్రవేశాలకు మాత్రమే నిర్వహించే పరీక్ష కావడంతో ఎప్‌సెట్(TS EAPCET)‌గా పేరు ఖరారు చేశారు.

ఇక రాష్ట్రంలో ఈ నెల 28వ తేదీ నుంచి ఇంటర్మీడియట్‌ వార్షిక పరీక్షలు (Telangana Inter Exams) ప్రారంభంకానున్నాయి. షెడ్యూల్ ప్రకారం.. ఫిబ్రవరి 28 నుంచి మార్చి 19వ తేదీ వరకు ఇంటర్‌ పరీక్షలు జరగనున్నాయి. ఇంటర్మీడియట్‌ హాల్‌టికెట్లు (TS Inter Hall Ticket 2024) సైతం ఫిబ్రవరి 15వ తేదీపైన విడుదల చేసే అవకాశం ఉంది. ఇక.. ఇంటర్మీడియట్‌ ప్రాక్టికల్‌ పరీక్షలు (జనరల్‌/వొకేషనల్‌ కోర్సులు) ఫిబ్రవరి 1 నుంచి 15 వరకు నిర్వహించనున్నారు. రెండో శనివారం, ఆదివారాల్లోనూ ప్రాక్టికల్‌ పరీక్షలు జరుగుతాయని షెడ్యూల్లో పేర్కొన్నారు. రెండు సెషన్లలో ప్రాక్టికల్స్ జరుగుతాయని.. ఉదయం 9 గంటల నుంచి మధ్యాహ్నం 12 గంటల వరకు మొదటి సెషన్‌.. మధ్యాహ్నం 2 గంటల నుంచి సాయంత్రం 5 గంటల వరకు రెండో సెషన్‌ పరీక్షలు నిర్వహించనున్నారు. ఈసారి ఇంటర్‌ ఫస్ట్‌ ఇయర్‌ విద్యార్థులకు ఇంగ్లీష్‌ ప్రాక్టికల్‌ పరీక్ష ఫిబ్రవరి 16వ తేదీన నిర్వహించనున్నారు.