TS Assembly Elections 2023 : జూపల్లిపై నాగం జనార్థన్ రెడ్డి సంచలన వ్యాఖ్యలు

కాంగ్రెస్లో విబేధాలు మరోసారి భగ్గుమన్నాయి. జూపల్లి కృష్ణారావుపై ఆ పార్టీ సీనియర్ నేత నాగం జనార్థన్ రెడ్డి సంచలన వ్యాఖ్యలు చేశారు. ఆయనకు కొల్లాపూర్ టికెట్ ఇవ్వడాన్ని తీవ్రంగా తప్పుబట్టారు. రేవంత్ రెడ్డి జూపల్లికి టికెట్ ఇచ్చి పార్టీ కోసం పనిచేసిన వారికి అన్యాయం చేశారని మండిపడ్డారు. 

రేవంత్ రెడ్డి పార్టీ కోసం కష్టపడిన వారికి టికెట్లు ఇవ్వకుండా అన్యాయం చేశారని నాగం ఆరోపించారు.  (TS Assembly Elections) అన్యాయం జరిగిన అభ్యర్థులందరికీ అండగా ఉంటామని, కలిసి పోరాటం చేస్తామని నాగం స్పష్టం చేశారు. పెద్దకొత్తపల్లి మండలం ముష్టిపల్లి గ్రామంలోని చింతలపల్లి జగదీశ్వర్ రావు ఫామ్ హౌస్లో కాంగ్రెస్ అసమ్మతి నేతల ఆత్మీయ సమ్మేళనంలో ఆయన ఈ వ్యాఖ్యలు చేశారు. పార్టీ కోసం కష్టపడిన వారికి జరిగిన అన్యాయానికి రేవంత్ రెడ్డి బాధ్యత వహించాలని డిమాండ్ చేశారు.

కర్నాటకలో కాంగ్రెస్ గెలవకపోయి ఉంటే జూపల్లి ఎక్కడుండేవారని నాగం ప్రశ్నించారు. ఆయన ఓ అవకాశవాది, కోవర్టు అని ఆరోపించారు. పొన్నాల లక్ష్మయ్యపై రేవంత్ వ్యాఖ్యల్ని తీవ్రంగా తప్పుబట్టారు. ఆయన బీసీ కులాన్ని అవమానించారని నాగం మండిపడ్డారు.