Congress CM: నేను సీఎం కావాలని ప్రజలు కోరుకుంటున్నారు: జానారెడ్డి
తెలంగాణలో ఎన్నికల హడావుడి రోజు రోజుకు పెరిగిపోయింది. ఆయా పార్టీల నేతలు వ్యూహాలు రచిస్తున్నారు. ఇప్పటికే బీఆర్ఎస్, కాంగ్రెస్ పార్టీలు అభ్యర్థుల తొలి జాబితా విడుల చేశాయి. దీంతో రాష్ట్రంలో రాజకీయ సందడి నెలకొంది. ఎవరికి వారు సరికొత్త ప్లాన్స్‌ రచిస్తున్నారు. మేనిఫెస్టోలు ప్రకటిస్తూ ప్రజలకు చేరువయ్యే ప్రయత్నం చేస్తున్నారు. ఈ క్రమంలో కాంగ్రెస్ సీనియర్ నేత జానారెడ్డి ఆసక్తికర వ్యాఖ్యలు చేశారు. ప్రజల హృదయాల్లో తాను సీఎం కావాలని ఉన్నట్లు చెప్పుకొచ్చారు.
మంగళవారం (అక్టోబర్ 17) నల్గొండ జిల్లా గుర్రంపోడులో జరిగిన కార్యకర్త సమావేశంలో మాట్లాడిన ఆయన ఈ వ్యాఖ్యలు చేశారు. తనను తానుగా సీఎం పదవి కావాలని కోరుకోవట్లేదని, సీఎం అయ్యే అవకాశం హఠాత్తుగా రావచ్చేమోనని అన్నారు. ఏ పదవి వచ్చినా కాదని చెప్పనని వివరించారు. రాష్ట్రంలో ఏ సీఎం చేయనన్ని శాఖలు తాను నిర్విహించినట్లు చెప్పారు. 21 ఏళ్లకే రాజకీయాల్లోకి వచ్చిన జానారెడ్డి.. 36 ఏళ్లకే మంత్రి పదవి చేపట్టినట్లు తెలిపారు. 55 ఏళ్ల రాజకీయ అనుభవం ఉన్న ఆయనకు.. ఏ పదవి అయినా దానంతట అదే వస్తుందని చెప్పుకొచ్చారు.