ఒకట్రెండు రోజుల్లో ఎన్నికల నోటిఫికేషన్ విడుదల కానున్న నేపథ్యంలో పార్టీలన్నీ అలర్ట్ అయ్యాయి. అధికార బీఆర్ఎస్ ఇప్పటికే 115 స్థానాల్లో అభ్యర్థుల్ని ప్రకటించగా.. కాంగ్రెస్, బీజేపీలు రేసులో వెనకబడ్డాయి. ఈ క్రమంలో బీజేపీ అభ్యర్థుల ఖరారు విషయంలో జోరు పెంచింది. వారం రోజుల్లో అభ్యర్థుల తొలి జాబితా విడుదల చేసేందుకు సిద్ధమవుతోంది.
బీజేపీ అభ్యర్థుల ఎంపిక ప్రక్రియ తుది దశకు చేరుకున్నట్లు సమాచారం. అయితే 119 స్థానాల్లో బరిలో నిలిపే అభ్యర్థులను ఒకేసారి కాకుండా 3 విడతల్లో ప్రకటించాలని బీజేపీ హైకమాండ్ నిర్ణయించినట్లు తెలుస్తోంది. ఈ క్రమంలోనే తొలివిడతలో 38 మంది అభ్యర్థుల పేర్లు ప్రకటించేందుకు సిద్ధమైనట్లు సమాచారం. ఈ నెల 15 లేదా 16వ తేదీల్లో బీజేపీ ఫస్ట్ లిస్ట్ రిలీజ్ చేసే అవకాశముంది.